منداڵانی بێ دایک و باوک لە قۆناخی باخچەی ساوایان تاوەکو 12 ئامادەیی لەو پەیمانگایە وەردەگیرێن
رووداو دیجیتاڵ
پەیمانگەیەکی تایبەت لە سلێمانی بووەتە ماڵی دووەمی منداڵانی بێ دایک و باوک، لەو پەیمانگەیە وانەی تایبەت بە فێربوونی زمان و پەروەردە بێ بەرامبەر بە منداڵان دەگوترێتەوە.
ئەم شوێنە، بووەتە جێگەی دڵخوازی هەموو منداڵەکان و بەخۆڕایی هەفتەی سێ رۆژ بۆی دێن. لە هەر پۆلێکی پەیمانگەکە، بەلایەنی کەمەوە 22 منداڵ لە تەمەن و ئاستە جیاوازەکان هەن.
دڵی هادی، یەکێک لە منداڵانی پەیمانگەکە بە رووداوی گوت "من، هیچ عەرەبی و ئینگلیزیم نەدەزانی، بەڵام ئێستا کە هاتووم بۆ ئێرە، زۆر باش فێربووم."
قوتابییەکی دیکە بەناوی پاراو هادی دەڵێ "لێرە راهێنانمان زۆر پێدەکەن، لە رێگەی ڤیدیۆ و هەموو شتێکەوە."
تاکە مەرجی وەرگرتنی منداڵ لەو پەیمانگایە ئەوەیە؛ بێ دایک و باوک بێت و هەژار بێت، چونکە دەیانەوێت بیکەنە ماڵی هەڵگرتنی ناز و پەروەردەکردنی منداڵ.
منداڵەکە لە هەر گەڕەک و جێگەیەکی سلێمانی وەرگیرابێت، رۆژانە بە پاس هاتووچۆی پێدەکرێت و دوو ژەم خواردنیشی بۆ دابینکراوە.
ئەسرا ئەحمەد، بەڕێوەبەری پەیمانگای تیم بە رووداوی گوت "ئێمە، 250 منداڵمان لە کۆڵانەوە هێناوە کە خێزانەکانیان هەژارن و ناتوانن باش پەروەردەی منداڵەکان بکەن، ئێمە هاتووین پەروەردەیان دەکەین و لە داهاتوو وا دەکەین ببنە خاوەن کاری خۆیان."
لەگەڵ وانە زانستی و پەروەردەییەکان، وانەی وەرزشی و هونەریش دوو وانەی سەرەکیی ئەو منداڵانەن. زۆربەی منداڵەکان فێری کاری دەستی کراون و بەرهەمەکانیان دەفرۆشنەوە، لە فرۆشەکەش 70٪ـی پارەکە بۆ منداڵەکە و 30٪ـەکەی دیکەشی بۆ کڕینی کەرەستەکان بەکاردەهێنرێت.
نەسرین ئەحمەد، سەرپەرشتیاری هونەری لە پەیمانگەکە بە رووداوی گوت "منداڵەکانم فێری ئەو کارانە کردووە، کە لە بازاڕ دەفرۆشرێن و خواستیان لەسەرە."
منداڵانی بێ دایک و باوک لە قۆناخی باخچەی ساوایان تاوەکو 12 ئامادەیی لەو پەیمانگایە وەردەگیرێن بەپێی مەرجەکان، تەواوی پڕۆژەکەش خێرخوازییە و بەڕێوەبەرانی چاویان لەوەیە؛ سەرمایەدار و خێرخوازان دەستی هاوکارییان بۆ درێژ بکەن و نەهێڵن ئەو پڕۆژەیە لە سێ مانگی داهاتوودا دووچاری داخستن یان خاوبوونەوە ببێت، چونکە دەڵێن تێچووەکەی زۆرە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ