چیرۆکی دایکی چوار منداڵ کە لە تەمەنی 22 ساڵیدا لە کەمپی بەردەڕەش کۆتایی بە ژیانی هێنا

 

ژنە پەنابەرێکی رۆژئاوای کوردستان بەرەبەیانیی رۆژی دووشەممە (21-8-2023) دوای چەند کاژێرێک لە گەڕانەوەی لەلای ماڵی خەسووی، خۆی هەڵواسی و کۆتایی بە ژیانی هێنا.

 

لەیلا ئیبراهیم، خەسووی سەباحە و باسی ئەو کاتە دەکات کە تەرمی بووکەکەی بینیوە، بە گریانەوە دەڵێ "لێوی شین ببووەوە و جەستەشی رەق ببوو، واتا نزیکەی دووی بەرەبەیان خۆی هەڵواسیبوو."

 

سەباحی تەمەن 22 ساڵ، خەڵکی شاری قامیشلۆی رۆژئاوای کوردستان بوو، ماوەی حەوت ساڵ بوو ژیانی هاوژینی پێکهێنابوو و چەند ساڵێکیشە لەگەڵ هاوژین و منداڵەکانیدا لە هەرێمی کوردستان دەژین.

 

ماوەی چوار ساڵ بوو، سەباح لە کەمپی بەردەڕەش دەژیا، ئەو ژنە دایکی چوار منداڵ بوو کە بچووکترینیان تەمەنی شەش مانگە.

 

تەییب محەممەد، هاوژینی سەباح، باسی ئەوە دەکات کاژێر پێنجی بەیانی زانیویەتی سەباح خۆی هەڵواسیوە، دەڵێ "پێش 15 رۆژ کە منداڵەکانمان بردنە نەخۆشخانە، بەمنی گوت 'هەتا کەی ئێمە لەو ژیانەدا دەبین؟' لەو دواییانەش، رەوشی دەروونیی زۆر خراپ بوو.''

 

تەییب کرێکارە و ئەگەر کاری دەستبکەوێت، رۆژانە لەنێوان 10 بۆ 20 هەزار دینار پەیدا دەکات، بەهۆی ئەوەی ئەرزاقیان لەسەر بڕاوە، بە هاوکاریی ماڵی باوکی دەژیان.

 

محەممەد موحسین، خەزووری سەباح دەڵێ ماڵ و منداڵی کوڕەکەی داوای هەر هاوکارییەکیان کردبێت، ئەوان یارمەتییان داون ''بەتایبەتی لەو دوواییانەدا کە ئەرزاقیان لەسەر بڕدرابوو."

 

سەباح بووە دووەم ژنە لەماوەی دوو ساڵی رابردوودا لە کەمپی بەردەڕەش، کە تاکە کامپی پەنابەرانی رۆژئاوای کوردستان تائێستا خێوەت بێت، خۆی کوشت.