رووداو-هەولێر
شەڕی نێوان سوپای تورکیا و گەریلاکانی پارتی کرێکارانی کوردستان- پەکەکە بووەتە هۆی چۆڵکردنی سەدان گوند لە سنووری هەردوو پارێزگای هەولێر و دهۆک. قایمقامی ئامێدی دەڵێت، تەنیا لە سنووری شارەکەی ئەو "195 گوند بەهۆی شەڕەوە چۆڵکراون."
رۆژی شەممە 20-8-2022، وارشین سەلمان، قایمقامی قەزای ئامێدی بە تۆڕی میدیایی رووداوی راگەیاند: "بەهۆی شەڕی نێوان تورکیا و پەکەکەوە لە ساڵانی 1990ـەوە 195 گوند چۆڵکراون و چی دیکە دانیشتوانیان لەو گوندانەدا ناژین."
وارشین سەلمان گوتیشی، جگە لەو 195 گوندە، شەڕی تورکیا و پەکەکە کاریگەری زۆری هەبووە و وایکردووە ئاوەدانکردنەوەی ژمارەیەک لە گوندەکانی دیکەش پەکیبکەوێت.
گوندەکانی سەر بە قەزای ئاکرێش بە دوور نەبوون لە کاریگەرییەکانی ئەو شەڕە. مازن محەممەد، قایمقامی قەزای ئاکرێ رۆژی شەممە 20-8-2022 بە رووداوی راگەیاند: "لەوکاتەوەی شەڕی نێوان تورکیا و پەکەکە هەیە، 25 گوند لە سنووری ئاکرێ چۆڵکراون. بەشێک لەو گوندانە پەکەکەیان تێدایە و دانیشتووانەکەیان بەهۆی ترسەوە لە هێرشی تورکیا بۆ سەر پەکەکە چۆڵیان کردووە."
بە گوتەی قایمقامی ئاکرێ، پێشتر چەند گوندێکی دیکەش چۆڵکرابوون، بەڵام دوای ئەوەی هێزەکانی پێشمەرگە چوونە گوندەکان و ئاسایشی گوندەکانیان پاراست، دانیشتووانەکەیان گەڕانەوە.
موشیر بەشیر، قایمقامی قەزای زاخۆش لەبارەی کاریگەریی شەڕی نێوان سوپای تورکیا و گەریلاکانی پەکەکەوە گوتی، ئەو شەڕە بووەتە هۆی چۆڵكردنی 25 گوند بە تەواوی.
سەردار شێخ یەحیا، قایمقامی قەزای شێخانیش لەبارەی چۆڵبوونی گوندەکانی سنووری شارەکەیەوە بە رووداوی گوت: "10 گوند چۆڵکراون کە زۆرترینیان دەکەونە سنووری ئەترووش و قەسرۆک. لە چەند ساڵی رابردوودا دانیشتووانی ئەو گوندانە بۆ کشتوکاڵ سەردانی گووندەکانیان دەکرد، بەڵام چەندین جار لە لایەن پەکەکەوە رێگرییان لێکرا، بۆیە هیچ ئارامییەکیان نەما و بە تەواوی چۆڵکران."
لە سنووری پارێزگای هەولێریش دەیان گوند چۆڵکراون. هەڵگورد نەجیب، سەرپەرشتیاری ئیدارەی سەربەخۆی سۆران رۆژی شەممە 20-8-2022 بە تۆڕی میدیایی رووداوی راگەیاند: "لەو کاتەوەی شەڕی نێوان تورکیا و پەکەکە هەیە، 183 گوند لە سنووری ئیدارەکەی چۆڵکراون. بە جۆرێک لە مێرگەسوور 65 گوند و لە سیدەکانیش 118 گوند چۆڵکراون."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ