چەند کاژێرێک کات بۆ تۆمارکردنی چەک ماوە و "لە سبەیەوە چەکی بێ مۆڵەت دەبێتە قاچاخ"

 

بەگوێرەی پلانەکانی وەزارەتی ناوخۆی هەرێمی کوردستان، ئەمڕۆ هەینی 21ـی تەممووزی 2023 دوایین رۆژە بۆ تۆمارکردنی چەکی بێ مۆڵەت؛ لەو بارەیەوە موقەدەم کارزان ئەمیر، گوتەبێژی پۆلیسی هەرێمی کوردستان ئەمڕۆ هەینی بە تۆڕی میدیایی رووداوی گوت، "هیچ بڕیارێک نییە بۆ درێژکردنەوەی ماوەی تۆمارکردنی چەکی بێ مۆڵەت".

 

چەکی بێ مۆڵەت لە 90 بنکەی پۆلیس لە هەرێمی کوردستان تۆمار دەکرێت. گوتەبێژی پۆلیسی هەرێمی کوردستان گوتی، "هەرچەندە ئەمڕۆ هەینییە، بەڵام تەواوی بنکەکانی پێدانی مۆڵەتی چەک لە هەرێمی کوردستان تاوەکو درەنگانی ئەمشەو کراوە دەبن و هەرکەسێک چەکی هەبێت، دەتوانێت ئەم چەند کاژێرەی ماوە تۆماری بکات".

 

کارزان ئەمیر ئاماژەی بەوەشکرد، لە سبەی شەممە 22ـی تەممووزەوە هەر چەکێکی بێ مۆڵەت دەستی بەسەردا بگیرێت بە قاچاخ هەژمار دەکرێت و بەگوێرەی یاسا مامەڵە لەگەڵ خاوەنەکەیدا دەکەن.

 

19ـی ئەم مانگە، هێمن میرانی، بەڕێوەبەری گشتیی دیوانی وەزارەتی ناوخۆی هەرێمی کوردستان بە تۆڕی میدیایی رووداوی گوت، "تاوەکو هەفتەی رابردوو زۆرترین چەک لە پارێزگای دهۆک تۆمارکرا بوو؛ لە هەولێر و سۆرانیش پێشوازییەکی باش کرابوو؛ لە پارێزگای سلێمانی کەمترین تۆمارکرابوو".

 

وەزارەتی ناوخۆ دڵنیایی دەداتە هەموو ئەو کەسانەی چەکیان هەیە کە بچن مۆڵەتی بۆ وەربگرن و بێگومان بن لەوەی لەلایەن بنکەکانەوە دەست بەسەر هیچ چەکێکدا ناگیرێت کە بۆ وەرگرتنی مۆڵەت برابێت.

 

بەگوێرەی مادەی 15ـی یاسای ژمارە 2ـی چەک لە هەرێمی کوردستان کە لە رۆژی 1-3-2022 لەلایەن پەرلەمانی کوردستانەوە پەسندکراوە، سزای هەڵگرتنی چەکی بێ مۆڵەت یان دەستداریی چەکی ئاگرین یان هەڵگرتنی، یان فرۆشتنی یان چاککردنەوە و دەستاودەستکردنی، بریتی دەبێت لە بەندکردن بە ماوەیەک لە یەک ساڵ کەمتر نەبێت و لە سێ ساڵ زیاتر نەبێت، هەروەها پێبژاردنێک لە دوو ملیۆن دینار کەمتر نەبێت و لە پێنج ملیۆن دینار زیاتر نەبێت.

 

بەگوێرەی یاساکە، ئەو کەسەی چەک هەڵدەگرێت، دەبێت تەمەنی لە 21 ساڵ کەمتر نەبێت و کێشەی دەروونی و جەستەیی نەبێت، پێشینەی تاوان و ئەمنی نەبێت، هەروەها پاساوێکی گونجاوی هەبێت بۆ هەڵگرتنی چەک.

 

وەزارەتی ناوخۆ 90 شوێنی دیاریکردووە بۆ تۆمارکردنی چەک، کە بەشێکیان ئەمانەی خوارەوەن:

 

 

- بنکەی پۆلیسی ئازادی – بەشی پۆلیسی ناوشار - رۆژئاوا

- بنکەی پۆلیسی راپەڕین - بەشی پۆلیسی ناوشار- رۆژهەڵات

- بنکەی پۆلیسی عەنکاوە – قەزای عەنکاوە

- بنکەی پۆلیسی خەبات – قەزای خەبات

- بنکەی پۆلیسی شەقڵاوە – قەزای شەقڵاوە

- بنکەی پۆلیسی پیرمام – قەزای پیرمام

- بنکەی پۆلیسی دەشتی هەولێر – قەزای دەشتی هەولێر

- بنکەی پۆلیسی کۆیە – قەزای کۆیە

 

 

- بنکەی پۆلیسی ئەزمەڕ – بەشی پۆلیسی ناوشار – رۆژهەڵات

- بنکەی پۆلیسی چوارچرا - بەشی پۆلیسی ناوشار – رۆژئاوا

- بنکەی پۆلیسی سەیدسادق – قەزای سەیدسادق

- بنکەی پۆلیسی شارەزوور – قەزای شارەزوور

- بنکەی پۆلیسی دەربەندیخان – قەزای دەربەندیخان

- بنکەی پۆلیسی قەرەداخ – قەزای قەرەداخ

- بنکەی پۆلیسی ماوەت – قەزای ماوەت

- بنکەی پۆلیسی پێنجوێن – قەزای پێنجوێن

- بنکەی پۆلیسی شارباژێڕ – قەزای شارباژێڕ

- بنکەی پۆلیسی دووکان – قەزای دووکان

- بنکەی پۆلیسی چەمچەماڵ – قەزای چەمچەماڵ

 

 

- بنکەی پۆلیسی نزارکێ – بەشی پۆلیسی ناوشار

- بنکەی پۆلیسی ماڵتا - بەشی پۆلیسی ناوشار

- بنکەی پۆلیسی بەردەڕەش – قەزای بەردەڕەش

- بنکەی پۆلیسی شێخان – قەزای شێخان

- بنکەی پۆلیسی سێمێل – قەزای سێمێل

- بنکەی پۆلیسی ئامێدی – قەزای ئامێدی

 

 

- بنکەی پۆلیسی هەڵەبجە – بەشی پۆلیسی دەوروبەر

- بنکەی پۆلیسی بیارە – ناحیەی بیارە

- بنکەی پۆلیسی سیروان – ناحیەکانی خورماڵ و سیروان

- بنکەی پۆلیسی بەمۆ – ناحیەی بەمۆ