رووداو دیجیتاڵ
یاریدەدەری وەزیری ناوخۆی تورکیا قەبارەی زیانی گیانی و مادیی ئاگرەکەی ئامەد و مێردینی راگەیاند و دەڵێت، 11 هاونیشتمانی گیانیان لەدەستداوە، 565 ئاژەڵ لەنێوچوون و 15 هەزار و 100 دۆنم زەویش سووتاوە.
ئێوارەی ئەمڕۆ هەینی 21ی حوزەیرانی 2024 مونیر کارالئۆغڵو، یاریدەدەری وەزیری ناوخۆی تورکیا، بە یاوەریی پارێزگاری ئامەد و ژمارەیەک پەرلەمانتاری پارێزگاکە سەردانی شارۆچکەی چناریان کرد، لەو شوێنەی ئاگری لێکەوتبووەوە کۆنگرەیەکی رۆژنامەڤانی رێکخست. پەیامنێری تۆڕی میدیایی رووداویش ئامادە بوو.
مونیر کارالئۆغڵو رایگەیاند، لە رووداوی ئاگرکەوتنەوەکەدا 11 هاونیشتمانی گیانیان لەدەستداوە، کە هەشتیان خەڵکی مێردینن و سێ کەسەکەی دیکەش خەڵکی ئامەدن؛ هەروەها 78 کەس بریندار بوون، کە شەش کەسیان دۆخی تەندروستییان ناجێگیرە و لە بەشی چاودێریی چڕی نەخۆشخانەکانی ئامەد و مێردین چارەسەر وەردەگرن.
یاریدەدەری وەزیری ناوخۆی تورکیا گوتیشی، لە ئامەد 8100 دۆنم زەوی سووتاوە کە 1410 دۆنمی گەنم و جۆی تێدا چێندرابوو و دروێنە نەکرابوو؛ شەش هەزار دۆنمیشی پووش و پاوان بوو. لە مێردینیش حەوت هەزار دۆنم زەوی سووتاوە کە چوار هەزار دۆنمی گەنم و جۆ بوو و دروێنەی نەکرابوو و سێ هەزار دۆنمیش پووش و پاوان بوو.
مونیر کارالئۆغڵو باسی لەوەشکرد، 565 سەر ئاژەڵی بچووک و گەورە لە ئەنجامی ئاگرەکە لەنێوچوون و 120 سەر ئاژەڵیش لەلایەن تیمی ڤێتێرنەرییەوە چارەسەر کراون.
نیوەشەوی رابردوو ئاگرێکی گەورە لە سنووری هەشت گوندی سەر بە شارۆچکەی چناری ئامەد و شەمرەخی مێردین کەوتەوە. ئاگرەکە لە ماوەیەکی زۆر کورتدا لە کۆنترۆڵ دەرچوو.
سەرەتای ئاگرەکە بە سووتانی پووش و پاوانی زەوییە کشتوکاڵییەکانی ئامەد بوو، کە دواتر بەهۆی باوە تەشەنەی کرد، زیانی بە زەوییە کشتوکاڵییەکانی هەشت گوندی دیکە گەیاند و گەیشتە سنووری مێردین.
یڵماز تونچ، وەزیری دادی تورکیا لە ئێکس رایگەیاند، لێکۆڵینەوە لەلایەن سەرۆکایەتی داواکاری گشتی دەستیپێکردووە سەبارەت بە ئاگرکەوتنەوەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ