رووداو دیجیتاڵ
جێگری سەرۆکوەزیرانی هەرێمی کوردستان دەڵێت، لەگەڵ ئەوەی کێشەی کەڵەکەبووی زۆر هەن، بەڵام لەنێوان حکومەتی هەرێمی کوردستان و عێراقدا لێکتێگەیشتنی باش هەیە.
ئەمڕۆ سێشەممە، قوباد تاڵەبانی، جێگری سەرۆکوەزیرانی هەرێمی کوردستان لەگەڵ فرانک ریڤۆڵتۆ، نوێنەری نەتەوە یەکگرتووەکان لە هەرێمی کوردستان کۆبووەوە؛ بەپێی نووسینگەکەی، "پێکەوە دوایین پێشهاتە سیاسییەکانی عێراق و کوردستان و پرسی هەڵبژاردن و چەند بابەتێکی دیکەی جێی بایەخی هەردوولایان تاوتوێ کرد".
لە راگەیێندراوەکەی نووسینگەی قوباد تاڵەبانیدا هاتووە، "جێگری سەرۆکوەزیران رۆڵی یۆنامی و بە تایبەت جێنین پلاسخارت، نوێنەری پێشووی تایبەتی سکرتێری گشتی نەتەوە یەکگرتووەکانی لە چارەسەرکردنی کێشە سیاسییەکانی عێراق و کوردستان بەرز نرخاند".
هەروەها باسی کێشەکانی نێوان حکومەتی هەرێمی کوردستان و بەغداشی کردووە و رایگەیاندووە، "لەم قۆناخەدا لێکتێگەیشتنی باش بۆ چارەسەرکردنی کێشەکان هەیە، راستە کێشەی کەڵەکەبووی زۆر هەیە لەنێوان هەردوولادا، بەڵام دەکرێت بە نیشاندانی نیازپاکی و کاری هاوبەش هەنگاو بە هەنگاو کێشەکان چارەسەر بکەین".
قوباد تاڵەبانی کە لە هەولێر لەگەڵ بەرپرسەکەی یۆنامی کۆبووەتەوە، گوتوویەتی، "بەبێ چارەسەرکردنی کێشەکان و بەبێ ستراتیژ و کاری هاوبەش ناتوانرێت بیر لە گەشەپێدانی عێراق و کوردستان و دابینکردنی ژیانی شایستە بۆ هاوڵاتیان بکەینەوە".
باسی هەڵبژاردنیش یەکێکی دیکە بووە لەو تەوەرانەی هەردوولا باسیان کردووە، بەبێ ئەوەی ئاماژە بۆ ناوەڕۆکی قسەکان لەو بارەیەوە بکرێت، وەکو لە راگێیندراوەکەدا هاتووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ