گەشتوگوزاری هەرێمی کوردستان: هاتنی گەشتیار بەلێشاو دەستیپێکردووە

 

رۆژی هەینی، 21ـی نیسانی 2023، ئیبراهیم عەبدولمەجید، بەڕێوەبەری راگەیاندن و پەیوەندییەکانی دەستەی گەشتوگوزاری هەرێمی کوردستان بە تۆڕی میدیایی رووداوی گوت: "بەگوێرەی ئەوەی بەشێکی زۆری پارێزگاکانی عێراق سبەی یەکەم رۆژی جەژنیانە و ئەمڕۆ پشوویان دەستیپێکردووە، لە ئەمڕۆوە هاتنی گەشتیار بۆ هەرێمی کوردستان بە لێشاو دەستیپێکردووە. لە دوو رۆژی رابردووشدا گەشتیار هەبوون، بەڵام ئەمڕۆ زیادیکردووە".

 

ئیبراهیم عەبدولمەجید گوتیشی، هاوئاهەنگییان لەگەڵ پۆلیس و ئاسایش کردووە و لە بازگەکاندا بە کاتێکی "زۆر کەم" گەشتیاران بەڕێ دەکرێن و تیمەکانی گەشتوگوزاریش رێنوێنی دەدەنە گەشتیاران و لە هەندێک شوێن بە پێدانی شیرینی پێشوازییان لێدەکەن.

 

بەڕێوەبەری راگەیاندن و پەیوەندییەکانی دەستەی گەشتوگوزاری هەرێمی کوردستان ئاماژەی بەوەشکرد، لە سێ مانگی یەکەمی ئەمساڵدا زیاتر لە دوو ملیۆن گەشتیاریان تۆمارکردووە. گوتیشی: "سێ جۆر گەشتیارمان هەیە. گەشتیاری زۆرینە لە پارێزگاکانی دیکەی عێراقەوە دێن؛ گەشتیاری دەرەوەی عێراقمان هەیە؛ گەشتیاری نێوخۆیی".

 

بەگوێرەی گەشتوگوزاری هەرێمی کوردستان، ساڵی رابردوو زیاتر لە 6 ملیۆن گەشتیار هاتوونەتە هەرێمی کوردستان.