رووداو دیجیتاڵ
بەڕێوەبەرایەتیی گشتیی کەشناسیی تورکیا هۆشداری دا، بەهۆی ئەگەری لێزمەبارانەوە لە ژمارەیەک پارێزگای باکووری کوردستان لافاو دروست دەبێت. دەشڵێت بەفربارین بەردەوام دەبێت.
بەڕێوەبەرایەتییەکە لە سایتی فەرمیی خۆیدا پێشبینییەکانی کەشوهەوای ئەمڕۆ پێنجشەممە، 21ـی ئاداری 2024، لە تورکیا و باکووری کوردستان بڵاوکردەوە و تێیدا هۆشداری لەبارەی دروستبوونی لافاو دا. پێشبینی دەکات لە پارێزگاکانی ئامەد، مێردین، ئێلیە، شرنەخ، سێرت و رووها شەپۆلێکی بەهێزی بارانبارین دەستپێبکات.
هۆشداریی لافاویش لە شارۆچکەکانی ستێور و شەمرەخ-ی مێردین؛ شارۆچکەی بەیشیب-ی شرنەخ، شارۆچکەی بەرواری سەر بە سێرت، دەوروبەری ئامەد؛ شارۆچکەی ساسۆن-ی ئێلیە؛ شارۆچکەکانی وێرانشار و سیوەرەک-ی رووها دەدرێت.
هاوکات بەفربارین پارێزگاکانی قەرس، ئەردەخان و ئەرزینگان دەگرێتەوە و تەواوی رۆژ بەردەوام دەبێت.
هاوکات، دەزگای ئافاد بە پشتبەستن بە پێشبینییەکانی بەڕێوەبەرایەتیی گشتیی کەشناسیی تورکیا، داوا لە هاونیشتمانیانی ئەم چەند پارێزگایەی باکووری کوردستان دەکات، بەتایبەتی گوندنشینەکان لە ئەگەری روودانی لافاودا بچنە سەربانی ماڵەکانیان.
دەزگای ئافاد، ئامادەباشیی خۆیشی راگەیاندووە بە هاوئاهەنگیی لەگەڵ شارەوانییەکان و فەرماندەیی هێزەکانی جەندرمە بەپێی پێویست بەهانای خەڵک دەچن لە ئەگەری کۆبوونەوەی ئاو بەهۆی لێزمەباران و ئەگەری روودانی لافاودا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ