رووداو دیجیتاڵ
سەرۆکی شارەوانیی ئاکرێ ئاشکرای کرد، دوێنێ زیاتر لە 100 هەزار کەس بەشداری مەراسیمی هەڵکردنی ئاگری نەورۆزیان لە ئاکرێ کردووە و نزیکەی 500 میوانی بیانی هاتوونەتە ئاکرێ بۆ بەشداریکردن لە مەراسیمەکە. دەشڵێت: "لە مەراسیمەکەی دوێنێ نزیکەی 100 تۆن زبڵ کۆکراوەتەوە."
بڵند زێباری، سەرۆکی شارەوانیی ئاکرێ بە رادیۆی رووداوی راگەیاند، لە ئاکرێ ئامادەکارییەکان بۆ جەژنی نەورۆز لە رۆژی 18ی ئادارەوە دەستپێدەکات کە پێشانگای هونەری و فۆلکلۆری دەکرێتەوە و لە رۆژی 20ی ئاداریش ئاگری نەورۆز دەکرێتەوە.
سەرۆکی شارەوانیی ئاکرێ گوتی: "لە مەراسیمی کردنەوەی ئاگری نەورۆز لە ئاکرێ زیاتر لە 100 هەزار کەس سەردانی شارەکەیان کردووە بۆ بەشداریکرن لە مەراسیمی هەڵکردنی ئاگری نەورۆز."
سەبارەت بە میوانی بیانیش، بڵند زێباری گوتی: "ئەمساڵ بەراورد بە ساڵانی رابردوو هاتنی میوانی بیانی بۆ شارەکە زیاتر بووە و نزیکەی 500 میوانی بیانی و هاتبوونە ئاکرێ."
لەبارەی پاککردنەوەی شارەکە، سەرۆکی شارەوانیی ئاکرێ ئاماژەی بەوە کرد، لە رۆژانی ئاساییدا لە ناوەندی شاری ئاکرێ رۆژانە نزیکەی 70 تۆن زبڵ و خاشاک کۆ دەکرێتەوە، بەڵام رۆژی رابردوو لەلایەن کۆمپانیای پاککەوانی شارەکەوە کە کاری پاککردنەوە و کۆکردنەوەی زبڵ و خاشاکی شارەکەی لە ئەستۆیە نزیکەی 100 تۆن زبڵ کۆکراوەتەوە واتا دوێنێ نزیکەی 30 تۆن زبڵ و خاشاک زیاتر هەبووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ