دوای پشووەکانی نەورۆز هەنگاوەکانی کاراکردنەوەی کۆمیسیۆنی هەڵبژاردن دەستپێدەکات

 

رۆژی سێشەممە 21-3-2023، سارا دڵشاد چاوشلى، ئەندامی لیژنەی کاراکردنەوەی کۆمیسیۆنی باڵای سەربەخۆی هەڵبژاردن و راپرسی لەبارەی کاراکردنەوەی کۆمیسیۆنەکە کە لە 23-12-2019ـەوە بەسەرچووە بە تۆڕی میدیایی رووداوی راگەیاند: "دوای ئەوەی لیژنەیەکی پێنج لە پەرلەمانی کوردستان بۆ کاراکردنەوەی کۆمیسیۆن پێکهێنرا بڕیارە دوای جەژنی نەورۆز، رێکارەکانی کاراکردنەوەی کۆمیسیۆن دەستپێبکات و لەماوەیەکی کەمدا هەوڵدەدەین کۆمیسیۆن کارابکرێتەوە بۆ ئەوەی دوای ئەوەش یاسای هەڵبژاردنی پەرلەمانی کوردستان هەمواربکرێتەوە و پەسندبکرێت." 

 

سارا دڵشاد چاوشلى ئاماژەی بەوەدا، بەپێی رێککەوتنی لایەن و هێزە سیاسییەکان پێکهاتەی کۆمیسیۆنی هەڵبژاردن وەکو ئێستا دەمێنێتەوە، تەنیا ئەوەی دەگۆڕێت کورسییە بەتاڵەکانی ئەنجوومەنی کۆمیسیاران پڕدەکرێتەوە کە ئێستا دوو کورسیی بەتاڵە یەکێکیان کورسیی پێکهاتەی تورکمان و ئەوی دیکەشیان کورسیی پارتی دیموکراتی کوردستانە.

 

ئەو ئەندامەی لیژنەی کاراکردنەوەی کۆمیسیۆن راشیگەیاند: "یەکەم هەنگاو بۆ کاراکردنەوەی کۆمیسیۆن بریتی دەبێت لە وەرگرتنی سیڤیی ئەو کەسانەی ئەو کورسییانە پڕدەکەنەوە، دەبێت لایەنە سیاسییەکانیان سیڤییەکانیان بۆ لیژنەکەی ئێمە بنێرن، دوای ئەوە پەسند دەکرێت و دەخرێتە بەردەم پەرلەمانەوە بۆ ئەوەی دەنگی پێبدات و دواتر کۆمیسیۆن بە پێکهاتەکەیەوە دەست بەکارەکانی بۆ ئامادەکاری بۆ هەڵبژاردن دەکات."

 

کۆمیسیۆنی باڵای سەربەخۆی هەڵبژاردن و راپرسیی هەرێمی کوردستان بەپێی یاسای ژمارە (4)ـی ساڵی 2014 پێکهاتووە؛ (9) ئەندامی ئەنجوومەنی کۆمیسیارانی هەیە، پارتی دیموكراتی كوردستان سێ ئەندام، یەكێتیی نیشتمانیی كوردستان دوو ئەندام، بزووتنەوەی گۆڕان دوو ئەندام و یەكگرتووی ئیسلامیی كوردستان یەک ئەندام و كۆمەڵی دادگەریی كوردستان یەک ئەندام، هەروەها لە 12 بەڕێوەبەری گشتیی كۆمیسیۆن، چواریان پارتی، سێیان یەكێتی، سێیان گۆڕان، یەک یەكگرتوو و یەکێکیان كۆمەڵە.

 

بڕیار بوو 1ـی تشرینی یەکەم هەڵبژاردنی خولی شەشەمی پەرلەمانی کوردستان بەڕێوەبچێت، بەڵام بەهۆی رێکنەکەوتنی لایەنەکان لەبارەی هەمواری یاسای هەڵبژاردن و کاراکردنەوەی کۆمیسیۆن نەتواندرا لەو وادەیە هەڵبژاردن بکرێت، ئێستا لایەنەکان نیمچە کۆدەنگییان هەیە بۆ ئەوەی یاسای هەڵبژاردن هەمواربکرێتەوە و لەسەر بەشێکی زۆری خاڵە ناکۆکەکانی پێشوو رێککەوتوون، بەتایبەت یەکێتی و پارتی و گۆڕان و یەکگرتوو و کۆمەڵی دادگەری.