هەڵەیەک روویدا! دووبارە هەوڵبدە
باڵەخانەی ئەنجوومەنی پارێزگای کەرکووک
رووداو دیجیتاڵ
لەسەر پرسی کەرکووک و پێکهێنانی ئیدارەی پارێزگاکە، سەرکردەی لایەنەکانی کورد و تورکمان و عەرەب لە بەغدا کۆبوونەوە.
رووداو زانیویەتی لە دەرئەنجامی کۆبوونەوەکەدا، ئەوە یەکلابووەتەوە کە راکان جبووری ناکرێتەوە پارێزگار، سیناریۆی دوو ساڵ پۆستی پارێزگار بۆ کورد و دوو ساڵی دیکە بۆ عەرەب، کۆدەنگی لەسەر بووە، بە مەرجی دابەشکردنی پۆستەکانی دیکە لەنێوان پێکهاتەکان.
کۆبوونەوەکەی بەغدا لەکاتێکدا کرا، بۆ یەکەمجار لە کەرکووکیش ئەندامانی کورد، عەرەب، تورکمان و کریستیان لەسەر خوانێک لە ماڵی شێخ ئەنوەر عاسی کۆبوونەوە.
رەعد ساڵح، ئەندامی فراکسیۆنی عەرەبی لە ئەنجوومەنی پارێزگای کەرکووک دەڵێت، "کۆبوونەوەکەی هەولێر گواسترایەوە بەغدا لەگەڵ سەرۆکوەزیران، بە ئامادەبوونی سەرجەم پێکهاتەکان و لایەنەکان، پێموایە کۆبوونەوەکە کاژێر 03:00، دەستیپێکرد، عەرەب و تورکمان و کورد بە سەرجەم حیزبەکانەوە ئامادەن لەو کۆبوونەوەیە، سەبارەت بە پێکهێنانی ئیدارەی خۆجێی کەرکووک دەبێ حکومەتێک بێت کۆدەنگی و رەزامەندیی لایەنەکانی لەسەر بێت، نامانەوێ ناڕازیبوونی هیچ لایەنێکی لەسەربێت."
بەپێی بڕیاری سەرکردایەتیی یەکێتی و پارتی لە کەرکووک، هەردوو فراکسیۆنەکە بەیەکەوە وەک یەک تیم دانوستاندن لەگەڵ پێکهاتەکان دەکەن.
رێبوار تەها، سەرۆکی فراکسیۆنی یەکێتی لە ئەنجوومەنی پارێزگای کەرکووک بە رووداوی گوت، "کۆبوونەوەیەک هەیە لە بەغدا و دڵنیام ئەنجامەکەی باش دەبێت، ئەم دەستپێشخەرییەش لەم بنەماڵە کەرکووکییە، سوپاسیان دەکەین و هەموومان پێکەوە کۆبووینەوە، ئەمە سەرەتایەکی باشە."
بەپێی زانیاریی تایبەت کە دەست رووداو کەوتووە، لە دەرئەنجامی لێکنزیکبوونەوەی لایەنەکانی کەرکووک، بڕیارە هەفتەی داهاتوو یەکەم کۆبوونەوەی ئەنجوومەن بە ئامادەبوونی سەرجەم ئەندامانی فراکسیۆنەکان بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ