داوا لە وەزیری تەندروستیی عێراق دەکرێت پشکنینی (DNA) بۆ 171 رووفاتی ئەنفالکراوان بکرێت

 

رۆژی سێشەممە، 21-2-2023، کاروان یاروەیس، نوێنەری گەرمیان لە ئەنجوومەنی نوێنەرانی عێراق، لەبارەی رووفاتی 171 ئەنفالکراو، رایگەیاند: "بە نووسراوێکی فەرمی داوام لە وەزیری تەندروستیی عێراق کردووە ئەو رووفاتە پێش هێنانەوەیان پشکنینی (DNA)یان بۆ بکرێت و پاشان بهێنرێنەوە بۆ زێدی خۆیان بۆ ئەوەی بناسرێنەوە."

 

ئەو 171 رووفاتە لە ساڵی 2019ـەوە لە گۆڕە بەکۆمەڵەکانی سەماوە لە باشووری عێراق دەرهێنراون. کاروان یاروەیس دەڵێت: "ئەوانە رووفاتی پیرۆزی خەڵکی گوندەکانی کەلار و رزگاریین، ئێستا لە دادپزیشکی بەغدان. ساڵی 2022 ئێمە ئاگادارکراینەوە فەرمانگەی دادپزیشکی تەرم و رووفاتێکی زۆری تێدایە و داوایان لێکردین پەلەبکەین لە بردنەوەی ئەو رووفاتانە."

 

لەبارەی هۆکاری دواکەوتنی هێنانەوەی رووفاتەکانیش، دەڵێت: "دوو رای جیاواز هەبوو، یەکێکیان ئەوە بوو کە رێوڕەسمی بۆ بکرێت و بنێژرێن، بۆچوونێکی دیکە هەبوو کە ئێمە لەگەڵی بووین و پێمانوابوو دەبێت پشکنینی دی ئێن ئەی(DNA)یان بۆ بکرێت بۆ ئەوەی بناسرێنەوە و کەسوکارییان بدۆزرێنەوە." گوتیشی: "جگە لەوەش پشکنینەکە بەڵگەیەکی گرنگە بۆ ئایندە و پڕۆسەی بە دیۆکیۆمێنتکردن لە چوارچێوەی بایەخدان بە پرسی ئەنفال کە پرسێکی نەتەوەیی و مرۆییە."

 

سەبارەت بە کاتی هێنانەوەی رووفاتەکانیش، کاروان یاروەیس روونیکردەوە: "ئێمە لەسەر هێڵین و لەگەڵ هەموو پەرلەمانتاران و نووسینگەی جێگری سەرۆکی حکومەتی هەرێمی کوردستان و لایەنەکانی دیکە بۆ ئەوەی رووفاتەکان پشکنینیان بۆ بکرێت و بهێنرێنەوە. داوامانکردووە رێکخراوی ICMP بێتە نێو پڕۆسەکەوە بۆ ئەنجامدانی دی ئێن ئەی، چونکە ئەو رێکخراوە بۆ داهاتوو کاریگەرییان دەبێت و لە پرسی بە دیۆکیۆمێنتکردن جێ بایەخ دەبن."

 

لە مانگی ئاداری ساڵی 2019، سێ گۆڕی بە کۆمەڵ لە بیابانەکانی سەماوە لە باشووری عێراق دۆزرانەوە و لە مانگی تەممووزی ئەو ساڵەدا هەڵدرانەوە، یەکێک لە گۆڕەکان 171 رووفاتی قوربانیانی شاڵاوەکانی ئەنفالی گەرمیانە، کە سەرجەمیان ژن و منداڵن، 74یان منداڵ و 97یان ژن بوون.

 

عادل ساڵح، بەڕێوەبەری راگەیاندن و پەیوەندییەکانی وەزارەتی شەهیدان و کاروباری ئەنفالکراوانی هەرێمی کوردستان، رۆژی سێشەممە بە تۆڕی میدیایی رووداوی گوت: "ئێمە وەکو رووفاتەکانی دیکە هەموو رێکارێکمان گرتەبەر بۆ ئەوەی بەباشترین شێواز پشکنینیان بۆ بکرێت و بەڕێزەوە بهێنرێنەوە و کارەکان تەواو بووبوون، بەڵام لەلایەن بەشێک لە کەسوکاری ئەنفالکراوانەوە لە بەغدا سکاڵا کرا و داوایانکرد پشکنینی دی ئێن ئەیان بۆ بکرێت، بۆیە دادگە رایگرت."

 

ئەنفال، ناوی ئەو شاڵاوەیە کە حکومەتی بەعس لە نیوەی دووەمی هەشتاکانی سەدەی رابردوو لە عێراق دژ بە کوردستانییان بە هەشت قۆناخ جێبەجێی کرد، زیاتر لە 182 هەزار کورد زیندەبەچاڵکران کە بەشێکیان ژن و منداڵن بوون، دوای زیاتر لە 18 ساڵ لە رووخانی رژێمی بەعس، هێشتا تەرمی زۆربەیان نەدۆزراوەتەوە.