دەم پارتی: سڵاو لە ویستی دیموکراسییانەی خەڵکی کەرکووک دەکەین

 

راگەیێندراوەکە لە هەژماری فەرمیی تۆڕی کۆمەڵایەتیی ئێکسی دەم پارتی بە سەردێڕی "سڵاو لە ویستی دیموکراسییانەی خەڵکی کەرکووک دەکەین" بڵاوکراوەتەوە. 

 

هەریەک لە تولای هاتیمئۆغوڵڵاری و تونجەر باکرهان، هاوسەرۆکانی دەم پارتی لەبارەی هەڵبژاردنەکە و بەتایبەتی پارێزگای کەرکووک دەڵێن، "هیوادارین ئەم هەڵبژاردنەی عێراق کە بۆ رۆژهەڵاتی نێوەڕاست زۆر گرنگە، ببێتە مایەی دەستەبەرکردنی دیموکراسی، دادپەروەری و ئازادی بۆ خەڵکی ناوچەکە. کەرکووک کە لەو هەڵبژاردنەی عێراقدا زۆرترین چاوی لەسەر بوو، پڕۆسەکە تێیدا دوور لە پشێوی و ئاژاوە بەڕێوەچوو. زیاتر لە پارتە سیاسییەکان، ویستی دیموکراسییانەی خەڵکی کەرکووک براوەیە".

 

هاوسەرۆکانی دەم پارتی دەڵێن، چەند دەوڵەت و هێزێکی ناوچەکە بەردەوام دەستوەردان لە کەرکووک دەکەن بۆ ئەوەی ناسەقامگیریی سیاسی تێدا دروست بکەن، بەڵام خەڵکی ئەو شارە چوونە سەر سندووقەکان و ویستی دیموکراسییانەی خۆیانیان نیشاندا و پیرۆزباییان لە کورد و گەلانی دیکەی کەرکووک کرد کە بەشدارییان لە هەڵبژاردنەکەدا کرد. 

 

هەر سەبارەت بە دەستوەردانەکانی نێو کەرکووک، هاوسەرۆکانی دەم پارتی رایانگەیاند، "لە بەرامبەر هەوڵەکانی تێگەیشتنی دەوڵەتی نەتەوەیی و ستراتیجیی دابەشبکە-بەڕێوەی ببە کە خەڵک بەگوێرەی ناسنامە و باوەڕیان جیادەکاتەوە، ویستی خەڵکی کەرکووک بۆ رۆژهەڵاتی نێوەڕاست بووە هیوا".

 

هاتیمئۆغوڵڵاری و باکرهان هیوایان خواستووە ئەنجامی ئەو هەڵبژاردنە ببێتە هۆی گەشەسەندنی دیموکراسی لە نێو خەڵکی کەرکووک و بە تەواوی ناوچەکەشدا بڵاوببێتەوە.

 

لە بەشی کۆتایی راگەیێندراوەکەدا، هاوسەرۆکانی دەم پارتی پیرۆزباییان لە یەکێتیی نیشتمانیی کوردستان کردووە و دەڵێن، "ویستی گەلی کورد هەروەک چۆن لە مێژوودا بینراوە، ئەمڕۆش لەسەر بنەمای پێکەوەژییان دەرکەوتووە. ئێمە لەو باوەڕەداین کارگێڕیی کەرکووک لە بەڕێوەبردنی شارەکە لە کەشێکی دیموکراسییانەدا، لە بابەتی ناسنامە و باوەڕی خەڵک هەستیاریی پێویست نیشاندەدات".

 

بە گوێرەی ئەو ئەنجامەی رۆژی سێشەممە، 19-12-2023، کۆمیسیۆنی باڵای سەربەخۆی هەڵبژاردنەکانی عێراق بڵاویکردەوە، لایەنە کوردستانییەکان لە کەرکووک 217 هەزار و 815 دەنگیان بەدەستهێناوە. 

 

یەکێتیی نیشتمانیی کوردستان 139 هەزار و 373 دەنگی بەدەستهێناوە؛ پارتی دیموکراتی کوردستان 46 هەزار و 749 دەنگ؛ نەوەی نوێ 24 هەزار و 620 دەنگ؛ هاوپەیمانیی مەشخەڵی کەرکووک کە یەکگرتوو و کۆمەڵ پێکیانهێنابوو، 6655 دەنگ و پارتی سۆسیال دیموکراتی کوردستان 377 دەنگیان بردووەتەوە، بەڵام تەنیا یەکێتی و پارتی بە 5 کورسی و 2 کورسی لە 15 کورسییەکەی ئەو پارێزگایە، لەنێو لایەنە کوردییەکان کورسییان بردووە.