رووداو دیجیتاڵ
بەرپرسانی پارتی دیموکراتی کوردستان و یەکێتیی نیشتمانیی کوردستان دەڵێن، ئەوانەی گەڕاونەتەوە کەرکووک و ناوچەکانی دیکەی مادەی 140، دانیشتووی رەسەنی ناوچەکەن.
حەسەن مەجید، سەرۆکی فراکسیۆنی پارتی دیموکراتی کوردستان لە ئەنجوومەنی پارێزگای کەرکووک، ئەمڕۆ چوارشەممە 20-11-2024 بە تۆڕی میدیایی رووداوی گوت، "ئەوانەی گەڕاونەتەوە کەرکووک و ناوچەکانی دیکە، خەڵکی رەسەنی شوێنەکەن. ئەو هاونیشتمانییانە لە رابردوودا بەهۆی سیاسەتەکانی بەعەرەبکردن و دواتریش رووداوەکانی 16ی ئۆکتۆبەرەوە ئاوارە بوون."
سەرۆکی فراکسیۆنی پارتی لە ئەنجوومەنی پارێزگای کەرکووک دەڵێت، "تۆمارکردنی ئەو هاونیشتمانییانە لە سەرژمێریی گشتیی دانیشتووان لە شوێنەکانی خۆیان، مافی خۆیانە. ئەوان هەموو بەڵگەنامەیەکی پێویستیان هەیە، وەکو کارتی نیشتمانی، فۆرمی خۆراک و تۆماری ساڵی 1957."
حەسەن مەجید گوتیشی، "پێویستمان بەوە نییە خەڵکی سلێمانی و هەولێر بێتە کەرکووک."
سەرۆکی فراکسیۆنی پارتی دەپرسێت، "چۆن خەڵکی هەولێر و سلێمانی دەتوانن لە کەرکووک و ناوچەکانی دیکەی مادەی 140 خۆیان تۆماربکەن؟" چونکە کارێکی لەو جۆرە پێویستی بە بەڵگە و دۆکیۆمێنتە و دەبێت هاووڵاتی بیسەلمێنێت کە خەڵکی ئەو ناوچانەیە.
هاوکات حەسەن گەرمیانی، جێگری لێپرسراوی مەڵبەندی حەمرینی یەکێتی لە قەزای خوورماتوو لە پارێزگای سەلاحەدین ئەمڕۆ چوارشەممە 20-11-2024 بە تۆڕی میدیایی رووداوی گوت، "ئەو کەسانەی گەڕاونەتەوە، خەڵکی رەسەنی کەرکووک و خورماتوو و ناوچەکانی دیکەی مادەی 140ن، گەڕاونەتەوە زێدی خۆیان تاوەکو لەم سەرژمێرییەدا وەکو مافێکی سەرەتایی لە زێدی رەسەنی خۆیان تۆمار بکرێن. ئەوان خانوو و زەویی کەسیان داگیر نەکردووە."
جێگری لێپرسراوی مەڵبەندی حەمرینی یەکێتی ئەوەشی خستەڕوو، "لە شەستەکانی سەدەی رابردووەوە کورد لە زێدی رەسەنی خۆی تاوەکو رووخانی رژێمی بەعس دەرکرا، دواتریش بەهۆی گرووپە تیرۆریستییەکان و رووداوەکانی 16ی ئۆکتۆبەرەوە کوردی ئەو ناوچانە ئاوارە بوون و زێدی رەسەنی خۆیان جێهیشت. ئێستا ئەو هاونیشتمانییانە گەڕاونەتەوە زێدی خۆیان و مافی سەرەتایی خۆیانە لە زێدی رەسەنی خۆیان تۆمار بکرێن."
حەسەن گەرمیانی بە سەرسوڕمانییەوە دەپرسێت، "نازانم بۆچی هەندێک خەڵک و لایەن پێیان ناخۆشە خەڵک بگەڕێنەوە زێدی رەسەنی خۆیان؟"
ئەوە لە کاتێکدایە، ئەمڕۆ چوارشەممە 20-11-2024 محەممەد مەهدی بەیاتی، بەرپرسی لقی باکووری رێکخراوی بەدر بە سەرۆکایەتیی هادی عامری راگەیێندراوێکی بڵاوکردەوە و باس لەوە دەکات کە گوایە "سەتان خێزانی کورد لە هەولێر و سلێمانی هاتوونەتە کەرکووک، بە ئامانجی تۆمارکردنیان لە سەرژمێریی دانیشتووان."
هاوکات هاوپەیمانیی عەرەبی لە کەرکووک داوای لە سەرۆکوەزیرانی عێراق و سەرپەرشتیارانی پرۆسەی سەرژمێری کرد رێکارەکانی سەرژمێریی دانیشتووان لە کەرکووک رابگرن.
لایەنە عەرەبییەکە پێیوایە "ژمارەیەکی زۆر"ـی خێزان تۆمارکراون کە خەڵکی کەرکووک نین، ئەوەش بە مەبەستی سەپاندنی دۆخێکی نوێی نیشتەجێبوون.
هەر لەوبارەوە، بەرەی تورکمانیی عێراقی سێشەممە 19-11-2024 لە راگەیێندراوێکدا گوتی، "بە نیگەرانییەکی زۆرەوە بە دواداچوون بۆ ئەو پێشلکردنە روونە دەکەین کە لە پرۆسەی سەرژمێریی گشتیی دانیشتوان لە پارێزگای کەرکووک دەکرێت. چەندین خێزان کە خەڵکی رەسەنی کەرکووک نین بە ئاشکرا و بە بەرچاوی رای گشتی و دەزگا ئەمنییەکانەوە هاتوونەتە نێو کەرکووک.ئەوەش هەوڵێکی ئاشکرایە بۆ یاریکردن بە دۆخی دانیشتووان و گۆڕینی دیمۆگرافیای پارێزگاکە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ