سەرچاوەیەک لە وەزارەتی دارایی بۆ رووداو: هەفتەی داهاتوو لیستی مووچەی مانگی 11 بۆ بەغدا دەنێرین

 

 

ئەمڕۆ چوارشەممە 20ی تشرینی دووەمی 2024 سەرچاوەیەک لە وەزارەتی دارایی هەرێمی کوردستان بە رووداوی راگەیاند، "ئەگەر کارەکان تەواو ببن، رۆژی یەکشەممەی هەفتەی داهاتوو، داهاتی ناوخۆ بۆ بەغدا دەنێردرێت. هاوکات لیستی مووچەی مانگی 11ش دەنێردرێت."

 

لەبارەی مووچەی مانگی تشرینی یەکەم، ئەو سەرچاوەیە گوتی، "وردبینیی ژمێرکاری لە لیستەکە بەردەوامە، دوای پڕۆسەی سەرژمێری، یەکەم گوژمەی مووچەی مانگی 10 خەرج دەکرێت."

 

ئەمڕۆ پەیامنێری رووداو لە بەغدا رایگەیاند، سەرۆکوەزیرانی عێراق رەزامەندیی داوە لەسەر خەرجکردنی مووچەی مانگی 10ی مووچەخۆرانی هەرێمی کوردستان، چاوەڕوان دەکرێت رۆژی یەکشەممە وەزارەتی دارایی پارەکە خەرج بکات.

 

گوتیشی، "وردبینی لە لیستەکە ئەو هەموو کاتەی ناوێت، بەڵام حکومەتی عێراق هەموو مانگێک بیانوویەک دەدۆزێتەوە بۆئەوەی مووچە دوابکەوێت."

 

ئێستا تەیف سامی، وەزیری دارایی عێراق گەشتی دەرەوەی وڵاتی کردووە، هەروەها رۆژانی چوارشەممە و پێنجشەممەش بەهۆی سەرژمێرییەوە پشووە، بۆیە خەرجکردنی مووچەکە دەکەوێتە رۆژی یەکشەممەی هەفتەی داهاتوو.

 

رۆژی 03-11-2024 لیستی مووچەی مانگی 10ی مووچەخۆرانی هەرێمی کوردستان لەلایەن تیمێکی تەکنیکیی وەزارەتی داراییەوە رادەستی وەزارەتی دارایی عێراق کرا، تاوەکو وردبینی تێدا بکرێت.

 

ئەو سەرچاوەیە گوتی، "ئەو وردبینییەی پێشووتر کرابوو ئەلیکترۆنی بوو، بەڵام ئەو وردبینییەی ئێستا چاوەڕوانین تەواو ببێت، وردبینیی ژمێرکارییە."

 

هەرێمى کوردستان مانگانە پێویستى بە 988 ملیار دینارە بۆ مووچەی مووچەخۆران و فەرمانبەرانی هەرێمی کوردستان.