قایمقامی قەزای شێخان: رێژەی بەشداریکردن گەیشتووەتە 70%

 

 

سەردار شێخ یەحیا، قایمقامی قەزای شێخان بە رووداوی گوت، لەکۆی 41 هەزار و 864 دەنگدەر، 28 هەزار و 876 کەس لە قەزاکە دەنگیداوە، واتە 70%ـی ئەوانەی مافی دەنگدانیان هەبووە، بەشداری دەنگدانیان کردووە. گوتیشی، "پێشبینی دەکەین بەشداریکردن لە دەنگدان 80% تێپەڕێنێت".

 

قایقامی قەزای شێخان ئاماژەی بەوەش کرد، "تاوەکو ئێستا هیچ سکاڵایەک تۆمار نەکراوە و هەموو لایەنە سیاسییەکان لە پڕۆسەی هەڵبژاردن لە قەزاکە رازین".

 

هەروەها سەردار شێخ یەحیا گوتیشی، کێشەی نەخوێندنەوەی پەنجەمۆر وایکردووە کە "ژمارەیەکی زۆر" لە دەنگدەران نەتوانن بەشداری لە دەنگدان بکەن و داواشی لە کۆمیسیۆن کرد کێشەکەیان بۆ چارەسەر بکات.

 

لە سنووری قەزای شێخان 17 بنکەی دەنگدان و 100 وێستگە هەن.

 

کاژێر 07:00ـی بەیانی ئەمڕۆ، دەرگای بنکەکان بۆ دەنگدانی گشتی لە شار و شارۆچکەکانی هەرێمی کوردستان بە رووی دەنگدەراندا کرانەوە.

 

لە زۆرێک لە بنکەکاندا ئامێرەکانی وردبینی، پەنجەمۆری بەشێک لە دەنگدەران ناخوێنێتەوە و کێشەکەش بەردەوامە.