مێرمنداڵێک گورچیلەکانی لەکارکەوتوون و بۆ چارەسەر 'پێویستی بە 65 ملیۆن دینارە'

 

دواڕۆژ لە تەمەنی یەک 18 مانگی نەخۆش کەوتووە؛ بەوهۆیەوە نەچووەتە قوتابخانە. قومری سڵێمان-ی دایکی لە بەرنامەی بەرپرسیاری تۆڕی میدیایی رووداو گوتی: "تاوەکو ئێستا 7 نەشتەرگەری جیاوازمان بۆ کردووە و دۆخی باش نەبووە. شەو و رۆژ لە رێگەی نەخۆشخانەم، دۆخی زۆر خراپە و خێرخواز هاوکاریمان دەکەن."

 

 

دواڕۆژ لە تەمەنی 5 ساڵی گورچیلەیەکی وەستاوە و دەرهێنراوە. ئێستا هەفتەی دووجار گورچیلەکەی دیکەی بۆ دەشۆردرێت.

 

ئەو مێرمنداڵە ئێستا گورچیلەکەی دیکەشی "بەتەواوی" لەکارکەوتووە. دکتۆر بڵند نەقشبەندی، پسپۆڕی نەخۆشییەکانی گورچیلە لە بەرپرسیار گوتی: "نەخۆشییەکەی دواڕۆژ سکماکییە، گورچیلەکەی دیکەشی بەتەواوی لەکارکەوتووە و پێویستی بە بە نەشتەرگەریی چاندنی گورچیلەیە"

 

 

بە گوتەی دکتۆر بڵند نەقشبەندی، شۆردنی گورچیلە چارەسەری یەکجاریی دواڕۆژ ناکات. "تەنیا چاندنی گورچیلە دەیگەڕێنێتەوە سەر ژیانی ئاسایی."

 

باوکی دواڕۆژ نەخۆشە و ناتوانێت کار بکات. خێزانەکە هیچ مووچەیەکیان نییە. 8 ئەندامی ئەو خێزانە لە گوندی مامیلیان لە سنووری قەزای رواندز دەژین.

 

کۆمەڵێک چالاکڤان و گەنجی خۆبەخش لە سنووری سۆران، لەماوەی رابردوو هەڵمەتێکی هاوکاری کۆکردنەوەیان بۆ خێزانی دواڕۆژ کردبوو. زانست حەکیم، یەکێک لەو چالاکڤانانە، بە رووداوی گوت: "تاوەکو ئێستا 25 ملیۆن دینارمان بۆ ئەو خێزانە کۆکردووەتەوە". بە گوتەی باوکی دواڕۆژ، نەشتەرگەرییەکە پێویستی بە 65 ملیۆن دینارە، چاوەڕێی خێرخوازن بۆ رزگارکردنی ژیانی کوڕەکەیان.