ئەمینداری یەکگرتوو: کۆسپ بۆ مووچە دروستبکرێت لە دادگەی فیدراڵی سکاڵا تۆمار دەکەین

 

سەڵاحەدین بەهائەددین، ئەمینداری گشتیی یەکگرتووی ئیسلامیی کوردستان، لە راگەیێندراوێکدا کە لە فەیسبووک بڵاویکردووەتەوە، نووسیویەتی "20ـی مانگە و پەنجا رۆژە مووچە نەدراوە، ئەم تاوانە بە ویژدانی کێ رەوایە؟ هۆکار هەرچی بێت و پاسا و هەرچی بێت، فەرمانبەری هەرێم و منداڵە بێنازەکانی باجەکەی دەدەن، دەستی دەستیکردن بەقووتی هاوڵاتییان لە فەرهەنگی چ مرۆڤێکی ویژدان زیندوودا جێی دەبێتەوە؟"

 

دادگەی باڵای فیدراڵی هەردوو حکومەتی عێراق و هەرێمی کوردستانی بە پێدانیی مووچەی مووچەخۆران لەکاتی خۆیدا، پابەندکردووە. ئەمەش دوای ئەوەی چەند ئەندامێکی یەکگرتوو لە دادگەی فیدراڵی سکاڵایان تۆمار کرد.

 

ئەمینداری گشتیی یەکگرتووی ئیسلامی کوردستان هەڕەشەی تۆمارکردنی سکاڵا دەکات و دەڵێت "جەخت لە راگرتنی ئەم یارییە ناشیرینە دەکەینەوە! دەبێت هەردوو حکومەت بەرپرسیارانە کارئاسانی بۆ جێبەجێکردنی بڕیارەکەی دادگا بکەن، نەک خۆبدزنەوە و کۆسپی بۆ دروست بکەن، شەڕی سیاسی و هەڵبەز و دابەزی بوارەکانی دیکە لەسەر حیسابی قووتی هاووڵاتی ساخبکەنەوە، بەپێچەوانەوە ئێمە ناچارین سکاڵا لەسەر سەرپێچیکار تۆمار بکەینەوە!"

 

ئەمڕۆ 20ـی ئابە و فەرمانبەرانی هەرێمی کوردستان تائێستا مووچەی مانگی تەمموزی 2024ـیان وەرنەگرتووە. 

 

رۆژی دووشەممە، 19ـی ئابی 2024، وەزارەتی دارایی عێراق بڕیاری خەرجکردنی تەنیا ملیارێک و 426 ملیۆن و 915 هەزار دیناری مووچەی فەرمانبەرانی هەرێمی کوردستانی بۆ مانگی حەوت دا. لەکاتێکدا بۆ خەرجکردنی تەواوی مووچە، زیاتر لە 900 ملیار دینار پێویستە.