قەدەخەکردنی راوەماسی کۆتاییهات و ماسیگران گەڕانەوە نێو بەنداو و رووبارەکان

ساڵانە لە هەرێمی کوردستان لە نێوەڕاستی مانگی ئادار تاوەکو نێوەڕاستی حوزەیران، بەهۆی دانانەوەی گەرا، ماسیگرتن قەدەخە دەکرێت. لەکاتی قەدەخەدا حکومەت بڕێکی زۆری پەنجەماسی دەخاتە نێو بەنداو و رووبارەکان تاوەکو بەرهەمی ماسی زیادبێت.

 

ئەمڕۆ پێنجشەممە، 20-6-2024، یەکەم رۆژی کۆتاییهاتنی قەدەخەی راوەماسییە. ئەبوبەکر ئیسماعیل، پەیامنێری رووداو دەڵێت، سەتان ماسیگر روویانکردووەتە بەنداوی دووکان و ناوچەکانی دیکە.

 

 

سەفین کە لە بەنداوی دووکان راوە ماسی دەکات بە رووداوی گوت: "خۆم و هەشت هاوڕێم لە دوێنێوە 50 تۆڕمان داناوەتەوە، هەشت ماسی نەچوونەتە نێو ئەو تۆڕانەوە. لەکاتی قەدەخە ماسییە گەورەکان سەرئاو دەکەون، رەنگە کەسانێک لەو کاتەدا بەردەوامبووبن لە راوکردن و ماسییە گەورەکانیان گرتبێت، بۆیە دەبێت حکومەت ئاگاداربێت و لە کاتی قەدەخە بە هیچ شێوەیەک رێگە بە راوەماسی نەدات". گوتیشی "پێناچێت پەنجەماسیی زۆر کرابێتە نێو ئاوەکانەوە، ئەگینا بەمشێوەیە بەرهەمی ماسی کەم نەدەبوو". 

 

بێستوون نەجمەدین، بەڕێوەبەری سامانی ماسی لە وەزارەتی کشتوکاڵی هەرێمی کوردستان لەکاتی بەشداریکردن لە بەرنامەی نووڕۆژ گوتی، گەشبینە بەوەی بەرهەمی ئەمساڵی ماسی زیاتر بووە.

 

 

بەگوێرەی ئاماری فەرمی، 413 پڕۆژەی بەخێوکردنی سامانی ماسی لە هەرێمی کوردستان مۆڵەتیان هەیە. ئەم ساڵ مۆڵەت دراوەتە 21 پڕۆژە، بەڵام بەڕێوەبەری سامانی ماسی لە وەزارەتی کشتوکاڵ دەڵێت: "هەزاران پڕۆژەی دیکەی بێمۆڵەت هەن، لەنێویاندا نزیکەی دوو هەزار پڕۆژەی بێمۆڵەت تەنیا لە کۆیە هەن". بۆ رێکخستنەوەی ئەو پڕۆژانەش، وەزارەتی کشتوکاڵ بڕیاریداوە "بە وەرگرتنی ئاماری پڕۆژە بێمۆڵەتەکان، تاوەکو بڕیار لە چارەنووسیان بدات". 

 

بەگوتەی بێستوون نەجمەدین، بەرهەمی ماسیی هەرێمی کوردستان خواستی نیوخۆیی پڕناکاتەوە. بەرهەمی ساڵانەی ئەو 413 پڕۆژەیە، نزیکەی سێ هەزار و 500 تۆن ماسییە، بەڵام 50٪ـی سامانی ماسیی بازاڕەکانی هەرێمی کوردستان، لە عێراق و وڵاتانی دیکەوە هاوردە دەکرێت.

 

هۆکاری کەمیی سامانی ماسی، وەک بەڕێوەبەری سامانی ماسی باسی دەکات: "کەمیی پڕۆژەکانی بەخێوکردنی سامانی ماسییە"، بۆیە داوا لە وەبەرهێنەران دەکات، روو بکەنە پڕۆژەکانی بەخێوکردنی ماسی، لەپێناو بەرزکردنەوەی بەرهەمی ساڵانە و پڕکردنەوەی خواستی نیوخۆ، دڵنیاییشیان پێدەدات لەوە "حکومەت ئاسانکارییان بۆ دەکات، هەموو ئاو و رووبارەکان بۆ وەبەرهێنەران کراوەن بۆ دانانی پڕۆژەی بەخێوکردنی ماسی، تەنانەت پێداویستیی پڕۆژەکانی بەخێوکردنی ماسی لێخۆشبوونی گومرگییان بۆ دەکرێت".