کۆنسوڵی ئێران لە هەولێر: سێ رۆژ پرسە دادەنێین

 

رۆژی دووشەممە، 20ـی ئاداری 2024 نەسروڵڵا رەشنودی، کۆنسووڵی گشتیی ئێران لە هەولێر لە کۆنفرانسێکی رۆژنامەڤانیدا رایگەیاند، دوای راگەیاندنی هەواڵی مەرگی سەرۆککۆمار و وەزیری دەرەوەی ئێران، کۆمەڵێک پەیامی سەرەخۆشییان لە بەرپرسانی هەرێمی کوردستان، ناوچەکە و جیهان پێگەیشتووە.

 

نەسروڵڵا رەشنودی گوتی: "ئەمە رووداوێکی گەورە بوو بۆ کۆماری ئیسلامی ئێران، بەڵام لەسەر بنەمای دەستووری ئێران و رەزامەندی رێبەری ئێران، دەستبەجێ محەممەد موخبیر، جێگری یەکەمی سەرۆککۆمار، وەکو بەڕێوەبەری دەستەی بەڕێوەبەرایەتی وڵات دەستبەکاربوو و ئێستا حکومەت لەسەر سکەی خۆی دەڕوات."

 

بە گوتەی کۆنسوڵی گشتی ئێران لە هەولێر، بەپێی دەستووری ئێران تاوەکو 50 رۆژی دیکە هەڵبژاردنی سەرۆککۆمار لە ئێران بەڕێوەدەچێت و سەرۆککۆمارێکی نوێ هەڵدەبژێردرێت.

 

سەبارەت بە رێوڕەسمی پرسەی قوربانییانی رووداوەکە، نەسروڵڵا رەشنوودی گوتی: "رێبەری کۆماری ئیسلامی لە پەیامێکدا پێنج رۆژی وەکو ماتەمینی گشتی راگەیاندووە و هەر بەم پێیەش ئێمە ئاڵاکەمان نیوە شەکاوە دەبێت و بۆ ماوەی پێنج رۆژ، هاوکات لە سبەی بەیانییەوە دەفتەری یادەوەری بۆ ماوەی سێ رۆژ لە کاژێر 09:00ـی بەیانی تاوەکو 04:00ـی ئێوارە دادەنێین و پێشوازی لە میوانە ئازیزەکان، کەسایەتییەکان، نوێنەرایەتی وڵاتان لە هەرێمی کوردستان و بەرپرسانی هەرێم و حیزب و لایەنەکان و ئێرانییەکانی دانیشتووی ئێرە دەکەین."

 

کۆنسوڵی ئێران رەتیکردەوە رووداوەکە پیلانگێڕی بووبێت و گوتی: "هەموو لایەنەکانی ئەو رووداوە لەژێر لێکۆڵینەوەدایە، بەڵام وەکو دیارە رووداوەکە بە کارەساتێکی سرووشتی و بەهۆی نالەباربوونی کەشوهەوا روویداوە، بەڵام ئەگەر دەپرسن ئێران گومانی لە هیچ وڵاتێک هەبێت لەوەی دەستی لە رووداوەکە هەبێت، من ئاگاداری ئەمە نیم."

 

ئێوارەی دوێنێ یەکشەممە، 19-05-2024، دوای تێکشکانی هێلیکۆپتەرەکەیان لەکاتی گەڕانەوەیان لەسەر سنووری ئازەربایجانەوە بۆ تەورێز، ئیبراهیم رەئیسی، سەرۆککۆماری ئێران و یاوەرەکانی گیانیان لەدەستدا. 

 

لەگەڵ رەئیسی، هەریەک لە حوسێن ئەمیرعەبدوڵڵاهیان، وەزیری دەرەوەی ئێران؛ ئایەتوڵڵا ئەلهاشم، پێشنوێژ و گوتارخوێنی تەورێز؛ مالیک رەحمەتی، پارێزگاری تەورێز؛ سەرۆکی پاسەوانەکان و پاسەوانێکی سەرۆککۆمار، فڕۆکەوانەکە و دوو یاریدەدەری لە هێلیکۆپتەرەکەدا بوون و گیانیان لەدەستدا.