رێواز فایەق بۆ رووداو: بافڵ تاڵەبانی بۆ ئەنجامدانی هەڵبژاردن دەستپێشخەرییەکی داوەتە پارتی
رووداو دیجیتاڵ
بافڵ تاڵەبانی، سەرۆکی یەکێتیی نیشتمانیی کوردستان بۆ دیاریکردنی رۆژی هەڵبژاردن دەستپێشخەرییەک دەداتە پارتی.
رێواز فایەق، سەرۆکی پەرلەمانی کوردستان رۆژی دووشەممە 20-02-2023 بە تۆڕی میدیایی رووداوی راگەیاند، بۆ ئەنجامدانی هەڵبژاردن لە ئەمساڵدا بافڵ تاڵەبانی دەستپێشخەرییەکی داوەتە پارتی و داوای کردووە مەکتەبی سیاسیی هەردوو حیزب لەسەر ئەو بابەتە کۆببنەوە.
ئەم هەنگاوەی بافڵ تاڵەبانی دوای کۆبوونەوەی دەستەی کارگێڕیی مەکتەبی سیاسیی حیزبەکەی بووە، کە سەرۆکی پەرلەمانی کوردستان و سەرۆکی فراکسیۆنی یەکێتییش لە پەرلەمانی کوردستان بەشداریی کۆبوونەوەکەیان کردووە.
سەرۆکی پەرلەمانی کوردستان دەڵێت، "داوامان لە کاک بافڵ و دەستەی کارگێڕیی مەکتەبی سیاسی کرد یەکێتی و پارتی گرفتەکانیان تێکەڵی هەڵبژاردن نەکەن، چونکە هەڵبژاردن پەیوەندیی بە حیزبەکانی دیکە و خەڵکیشەوە هەیە و تەنیا کێشەی پارتی و یەکێتی نییە."
بە گوتەی رێواز فایەق، "بافڵ تاڵەبانی بە پێشنیازەکە رازی بوو و دەستبەجێ داوای لە رەفعەت عەبدوڵڵا کردووە پەیوەندی بە فازڵ میرانی، بەرپرسی دەستەی کارگێڕیی مەکتەبی سیاسیی پارتییەوە بکات و دەستپێشخەرییەکەی پێ بگەیێنێت، ئێستاش چاوەڕێی وەڵامی پارتی دەکەین."
سەرۆکی پەرلەمانی کوردستان ئەوەشی خستەڕوو، یەکێتی ئامادەیە لەسەر دیاریکردنی رۆژێک بۆ هەڵبژاردن لەگەڵ پارتی کۆببێتەوە و رێکبکەون.
لەبارەی دەستپێکردنەوەی کۆبوونەوەکانی پەرلەمانی کوردستانیش، د. رێواز فایەق بە رووداوی راگەیاند، لە سەرەتای مانگی سێ کۆبوونەوەکانی پەرلەمان دەستپێدەکەنەوە و دوای رێککەوتنی پارتی و یەکێتیش راستەوخۆ دەست بە خوێندنەوە بۆ ئەو پرۆژە یاسایانە دەکەن کە بۆ هەمواری یاسای هەڵبژاردن پێشکێش کراون.