عەلی قەڵایی: دەکرێت دەنگی ئیسلامییەکان بفەوتێت

 

رۆژی 19ی کانوونی یەکەمی 2023، عەلی قەڵایی، سەرپەرشتیاری بەشی هەڵبژاردنی کەرکووک – سەلاحەدینی یەکێتیی نیشتمانیی کوردستان بە رووداوی راگەیاند: "لایەنە عەرەبییەکان کە رکابەرێکی تووندی ئێمەن، لەوانەیە ژمارەی دەنگەکانیان بگاتە 180 – 190 هەزار دەنگ. بەڵام پێشبینی دەکەم دەنگەکانی کورد بگاتە 200 هەزار و لە کەرکووک یەکەم دەبێت."

 

سەرپەرشتیاری بەشی هەڵبژاردنی کەرکووک – سەڵاحەدینی یەکێتی ئاماژەی بەوەکرد: "ئومێد دەکەین کورد 8 کورسی بهێنێت و 50+1ی ئەنجوومەنەکە بین، بۆ یەکلاکردنەوەی پۆستەکان گرنگە بۆ کورد. چەندین ساڵە ستەممان لێ دەکرێت؛ پەراوێزیان خستووین، ئومێدمان وایە بگەینە ئەو رێژەیە و 50٪ی کورسییەکان لای ئێمە بێت."

 

بە گوتەی سەعدی پیرە، گوتەبێژی یەکێتیی نیشتمانیی کوردستان، پێش هەڵبژاردن، یەکێتی زۆر هەڵیداوە کورد لە کەرکووک و ناوچە دابڕێندراوەکان بە یەک لیست بچێتە هەڵبژاردنەوە، بەڵام رێکنەکەوتن. عەلی قەڵایی لەو بارەوە دەڵێت: "یەکێتی یەکەمی کەرکووک دەبێت، لیستی راکان جبووری دووەم و دواتر پارتی و لیستی بەرەی تورکمانی، لێک نزیکن. لایەنە ئیسلامییەکانیش بەداخەوە ئەگەری هەیە دەنگیان بفەوتێت و ئەمە بۆ کورد زەرەرێکی گەورەیە. پێشتر پێشبینی ئەمەمان کردبوو، هەروەها ئاگەداریشمان کردبوونەوە کە ئێوە بەدروستکردنی ئەو لیستە دەنگی کورد دەسووتێنن."

 

تائێستا ئەنجامی فەرمی رانەگەیێندراوە، بڕیارە ئەمڕۆ کاژێر 17:00 کۆمیسیۆنی باڵای هەڵبژاردنەکانی عێراق، ئەنجامی فەرمی رابگەیێنێت.  

 

بەپێی ئەو زانیارییانەی دەست هەردی محەممەد، پەیامنێری رووداو لە کەرکووک کەوتوون، بەپێی ئەنجامی هەزار و 417 وێستگەی دەنگدان لە ناوەندی کەرکووک، ئەنجامەکان بەمجۆرە بوون:

 

یەکێتیی نیشتمانیی کوردستان: 132,481 دەنگ 

پارتی دیموکراتی کوردستان: 44,798 دەنگ 

نەوەی نوێ: 23,548 دەنگ 

 

بەپێی بەدواداچوونێکی رووداو، لە کۆی گشتی دەنگەکاندا لە سنووری پارێزگای کەرکووک، بەپێی ئەنجامە نافەرمییەکان، دەنگەکان بەمشێوەیە بووە:

 

یەکێتیی نیشتمانیی کوردستان: زیاتر لە 155 هەزار دەنگ

پارتی دیموکراتی کوردستان: 49 هەزار دەنگ 

نەوەی نوێ: نزیکەی 25 هەزار دەنگ