بەڕێوەبەری ئاوی هەرێمی کوردستان: کێشەی ئاوی دەربەندیخان چارەسەر دەکرێت
رووداو دیجیتاڵ
ماوەی چەند ساڵێکە کارکردن لە پڕۆژەی ئاوی دەربەندیخان وەستاوە. حکومەتی هەرێمی کوردستان بەڵێندەری ئاگادارکردووەتەوە دەست بە پڕۆژەکە بکەنەوە. بەڕێوەبەری ئاو و ئاوەڕۆی هەرێمی کوردستانیش دەڵێت، کێشەی ئاوی خواردنەوەی دەربەندیخان بەو پڕۆژەیە چارەسەر دەبێت.
بەپێی راگەیێندراوێکی فەرمانگەی میدیا و زانیاریی حکومەتی هەرێمی کوردستان کە ئەمڕۆ هەینی 19-11-2021 بڵاوکراوەتەوە، پڕۆژەکە لە دووبەش پێکدێت.
بەشی یەکەم:
وه‌رگری سه‌ره‌كیی ئاو كه ئه‌‌مانه‌ی خواره‌وه له‌خۆ ده‌گرێت:
ـ حه‌وزێكی هەزار و 500 مەتر چوارگۆشە.
ـ ژوورێكی تایبه‌ت به ماتۆڕ.
ـ ژووری كاره‌با.
ـ ژووری كلۆر.
ـ بورجی به‌هه‌واكردنی ئاو
ـ هێڵێكی گواستنه‌وه له نێوان هه‌ردوو به‌ش به تیره‌ی 20 ئینج و درێژی دوو هەزار و 300 مەتر، کە بەكاردێت بۆ گواستنه‌وه‌ی ئاو له وه‌رگره‌وه بۆ به‌شی پاككه‌ره‌وه.
به‌شی دووه‌م:
به‌شی پاككه‌ره‌وه‌ی ئاو کە به‌مشێوه‌یه كارده‌كات:
- دوای ئه‌وه‌ی ئاوه‌كه به رێگه‌ی بۆڕیی گواستنه‌وه وه‌رده‌گیرێت، ده‌چێته حه‌وزێكی تایبه‌ت كه به مه‌به‌ستی نیشتاندنی هەزار مەتری چوارگۆشه ئاو دروستكراوه، ئینجا ده‌چێته ژووری ماتۆڕ و به هێڵێكی 50 سانتیمەتری ده‌به‌سترێته‌وه به یه‌كه‌ی سه‌ره‌كیی پاككردنه‌وه‌ی ئاوه‌كه.
-یه‌كه‌ی سه‌ره‌كیی پاككردنه‌وه‌ی ئاوه‌كەش له دوو به‌ش پێكدێت:
ـ به‌شێكی سانت فیلته‌رە کە پاشماوه و خڵته و لیكی ئاوه‌كه كه‌مده‌كاته‌وە.
ـ به‌شه‌كه‌ی دیکەش كاربۆن فیلته‌رە، كه بۆن و تام و رە‌نگی ئاوه‌كه ناهێڵێت و پاكی ده‌كاته‌وه.
هەر لە پڕۆژەکەدا به‌رله‌وه‌ی ئاوە پاككراوه‌کە بدرێته هاونیشتمانییان، پێویستە به ژووری تایبه‌ت به پشكنینی كیمیایی تێپه‌ڕێت و دوای پشكنینه‌كه دەکرێتە حه‌وزێكی دوو هەزار مەتر چوارگۆشەوە و له‌وێشه‌وه ده‌درێته هاونیشتمانییان.
لە سنووری قەزای دەربەندیخان لە پارێزگای سلێمانی، 12 هەزار هاوبەشی ئاو هەن. ماوەی چەند ساڵێکە کێشە لە ئاوی خواردنەوەی قەزاکەدا هەیە.
ئەمڕۆ هەینی 19-11-2021، ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە تۆڕی میدیایی رووداوی گوت، نەخشەی دارایی بۆ پڕۆژەکە دیاریکراوە و بڕی ئەو پارەیەی بۆی تەرخانکراوە 1.3 ملیۆن دۆلار و ملیار و نیوێک دینارە، کە بەپێی کارەکە بەشبەش خەرج دەکرێت.
سەبارەت بەوەی کەی دەستبەکارکردن دەکرێتەوە لە پڕۆژەکەدا، ئاری ئەحمەد گوتی، بەڵێندەر ئاگادارکراوەتەوە، ئەویش ستافێکی لەگەڵدایە کە لە دەرەوەی وڵاتن و چاوەڕانی گەڕانەوەی ئەوان دەکات و گوتی: "بەدڵنیاییەوە لە ماوەیەکی نزیکدا دەستبەکارەکە دەکرێتەوە و کێشەی ئاوی دەربەندیخان چارەسەردەکرێت".