رووداو دیجیتاڵ
لە سنووری ئیدارەی گەرمیان لە ئۆپەراسیۆنێکدا لە دژی داعش فەرماندەی هێزەکانی کۆماندۆی کوردستان و چەند کارمەندێکی دیکەی ئەو هێزە بریندار دەبن و یەکێکیشیان گیانی لەدەستدا. بەرپرسی یەکەی 70ـی هێزی پێشمەرگە دەڵێت، "تۆڕێکی مین بووە پێیاندا تەقیوەتەوە."
رۆژی چوارشەممە 19-10-2022، مستەفا چاوڕەش، بەرپرسی یەکەی 70ـی هێزی پێشمەرگە بە تۆڕی میدیایی رووداوی راگەیاند، کاژێر 9:30 خولەکی بەیانیی ئەمڕۆ لە کاتی ئۆپەراسیۆنێک دژی داعش، "تۆڕێکی مین بە هێزەکانی کۆماندۆدا تەقیونەتەوە."
ئۆپەراسیۆنەکە لە سنووری تاوێرکەوە لە ناوچەی پەڵکانە و زینانە لە سنووری گەرمیان بووە. میدیای فەرمیی یەکێتیی نیشتمانیی کوردستان لە راگەیێندراوێکدا دەڵێت، ئاکام عومەر، فەرماندەی ھێزەکانی کۆماندۆی کوردستان "بە سەختی" برینداربووە و ئەفسەر زوھێر محەممەد گیانی لەدەستداوە و حەوت پێشمەرگەی دیکەی ھێزی کۆماندۆی کوردستان برینداربوون.
لەبارەی دۆخی بریندارەکانەوە، مستەفا چاوڕەش گوتی: ئاکام عومەر و سێ کەسی دیکە لە نەخۆشخانەی فاروقن و لە ژێر چاودێری-دان، نازانین تەندروستییان چۆنە، چونکە ئەوە لای پزیشکەکانە، بەڵام هیوادارین باشبن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ