رووداو وردەکاریی جێبەجێکردنی یاسای چاکسازی لە سێ مانگدا بڵاودەکاتەوە

 

بەشی یەکەم لە راپۆرتەکەی حکومەت تایبەتە بە ئامانجەکانی جێبەجێکردنی یاساکە، تێیدا هاتووە، "بۆ بەدامەزراوەییکردن و یەکخستنی بەڕێوەبەرایەتی و فەرمانگە و یەکە جیاجیاکان کە مووچەی خانەنشینی تێدا خەرج دەکرێت، لیژنەکە وەزارەتی دارایی راسپاردووە بۆئەوەی پێشنیازەکانی بۆ دامەزراندنی سندووقی خانەنشینی ئامادە بکات و هەیکەلبەندییەکی نوێ ئامادە بکات. 

 

یاسای چاکسازی لە 1-7-2020 چووە بواری جێبەجێکردنەوە. راپۆرتەکەی حکومەتیش لە 151 پەڕە پێکهاتووە، هەنگاوەکانی بۆ جێبەجێکردنی یاساکە خستووەتەڕوو.

 

گرنگترین خاڵەکانی راپۆرتەکە: 

- 106 هەزار و 839 کەس زیاتر لە یەک مینحە و ئیمتیاز وەردەگرن و بەپێی یاساکە سەرپشکدەکرێن بە وەرگرتنی تەنیا یەک لەو مووچە، مینحە یان ئیمتیازاتانەی لە بودجەی گشتی وەریدەگرن

- بە جێبەجێکردنی قۆناخی دووەمی بایۆمەتری، هیچ کەسێک ناتوانێت دوو جار لە بودجەی گشتی سوودمەند بێت

- جێبەجێكردنی بڕگەکانی یاسای چاکسازی هیچ ئاسەوارێکی دارایی و دادوەری لێناكەوێتەوە بۆ ئەو کەسانەی پێشتر سوودمەند بوون و ئێستا بەپێی یاساکە مووچە و شایستە داراییەکانیان دەبڕدرێت 

- دامەزراندن بە پلەکانی بەڕێوەبەری گشتی و راوێژكار و سەرووتر، رادەگیرێت مەگەر تەنیا لەو كاتەدا کە شوێنی بەتاڵ هەبێت

- تۆمارکردنی زیندانی و گیراوی سیاسی نوێ لە وەزارەتی شەهیدان و ئەنفالکراوان هەڵدەپەسێردرێت تاوەکو ئەرکی وردبینی و پێداچوونەوە و پاککردنەوەی لیستەکان تەواودەبێت

- لیستی خانەنشینکراوانی سەر بە وەزارەتی پێشمەرگە دەگوازرێتەوە سەر وەزارەتی دارایی و ئابووری و لیستی شەهیدان و کۆچکردووانی وەزارەتەکە دەگوازرێتەوە سەر وەزارەتی شەهیدان. لەنێویاندا هەزار و 47 شەهیدی شەڕی داعش

 

بەشی دووەمی راپۆرتەکەدا تایبەتە بە رێکخستنەوەی ماف و ئیمتیازاتەکانی میراتگرانی کەسوکاری شەهیدان و ئەنفالکراوان و زیندانیکراو و گیراوانی سیاسی. ماددەکە لە پێنج بڕگە پێکهاتووە و لە بڕگەی سێیەمدا هاتووە، "وەزارەتی کاروباری شەهیدان و ئەنفالکراوان لیژنەیەکی تایبەتی پێکهێنا بە سەرۆکایەتیی نوێنەری ئەنجوومەنی وەزیران و.. ئەرکی وردبینی و پێداچوونەوە و پاککردنەوەی لیستەکانی زیندانی و راگیراوی سیاسی بەپێی شایستەی یاسایی دیاریکراو دەگرنە ئەستۆ و لەکار بەردەوامن".

 

بەشی چوارەمی راپۆرتەکەش لەبارەی پێشمەرگە، هێزەکانی ئاسایش و پۆلیسی ناوخۆیە، لە بڕگەی سێیەمیدا هاتووە، وەزیری پێشمەرگە دەسەڵاتی داوە بە فەرمانگەی چاودێریی دارایی بۆ وردبینیکردنی لیستی پێشمەرگە و پێداچوونەوە بە خزمەتی پێشمەرگایەتی. 

 

لە بابەتی دەرماڵەکانیشدا هاتووە، ناوەندی راوێژی یاسایی لە ئەنجوومەنی وەزیران رەشنووسی بڕیاری رێکخستنەوە و پێداچوونەوەی بە گشت دەرماڵەکانی ئامادە کردووە.

 

هەموو مامەڵەیەکی خانەنشینی، بەپێی راپۆرتەکەی حکومەت، لە 1ـی تەممووزەوە بەپێی رێنمایی ژمارە 13 و یاسای چاکسازی کراوە.

 

حکومەت لە راپۆرتەکەیدا باسی لەوە کردووە، یاسای چاکسازی لە مووچە و دەرماڵە و بەخشین و ئیمتیازاتەکان و خانەنشینی لە هەرێمی کوردستان "لەپێناو هێنانەدی دادپەروەری و یەکسانی لەنێوان سەرجەم سوودمەندان و مووچەخۆرانی هەرێمی کوردستانە لە بودجەی گشتی".