رووداو دیجیتاڵ
ئەنجوومەنی باڵای دادوەریی عێراق رایگەیاند، دادگەی تاوانەکانی کەرکووک سزای لەسێدارەدانی بۆ سەرکردەیەکی داعش دەرکرد، کە لەساڵی 2014ەوە پەیوەندیی بە گرووپە "تیرۆریستییەکان"ەوە کردووە و چەندین کەسی کوشتووە.
رۆژی سێشەممە 19-9-2023، ئەنجوومەنی باڵای دادوەریی عێراق رایگەیاند، دادگەی باڵای تاوانەکانی عێراق، سزای لەسێدارەدانی بۆ سەرکردەیەکی داعش دەرکرد بەتۆمەتی پەیوەندیکردن بە گرووپە چەکدارەکانەوە لە ساڵی 2014 و بەشداریکردن لە هێرشەکانی سەر هێزە ئەمنییەکان.
بەگوێرەی راگەیێندراوێکی ئەنجوومەنی باڵای دادوەریی عێراق، ئەو کەسە بەرپرسیاریێیی لە نێو دیوانی حەسبە و ئەمنیی داعشدا هەبووە و بەشداری لە کوشتن و دەستگیرکردنی ژمارەیەک هاووڵاتیدا کردووە.
ئەنجوومەنی باڵای دادوەری دەڵێت، ئەو کەسەی سزاکەی بۆ دەرچووە ئەو کاتەی بەرپرس بووە لەنێو رێکخراوی داعش بە پاساوی جگەرەکێشان خانووی کەسێکی لە سنووری پارێزگای کەرکووک تەقاندووەتەوە و سزای لێدانی 40 جەڵدەی بەسەردا جێبەجێکردووە.
ئەو سەرکردەیەی داعش بەپێی مادەی دووی یاسای بەرەنگاربوونەوەی تیرۆری ژمارە 13ـی ساڵی 2005 دادگایی کراوە و سزای لەسێدارەدانی بۆ دەرچووە.
رێکخراوی داعش لە حوزەیرانی ساڵی 2014 هێرشی کردە سەر شاری مووسڵی ناوەندی پارێزگای نەینەوا و کۆنتڕۆڵی کرد، لەو ماوەیەدا چەندین کەسی کوشت کە بە نزیکەی 20 هەزار کەس مەزەندە دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ