مانگرتن بەهۆی گیانلەدەستدانی ژینا ئەمینی لە بەشێکی رۆژهەڵاتی کوردستان دەستیپێکرد

 

بەپێی راپۆرتی رێکخراوەکانی مافی مرۆڤی رۆژهەڵاتی کوردستان، دووکان و بازاڕی شارەکانی سەقز، سنە، مهاباد، شنۆ، نەغەدە، پیرانشار، دیواندەرە، بۆکان، مەریوان و بەشێک لە دووکان و بازاڕی شارەکانی کامێران و سەردەشتیش داخراون.

 

بەپێی ئەو زانیارییانەی دەست رووداو کەوتوون، لە هەندێ لەو شارانەی دووکان و بازاڕ داخراون کەشی ئەمنی زاڵ بووە و گوشار بۆ دووکانداران هێنراوە، دووکانەکانیان بکەنەوە.

 

لە رۆژانی رابردوودا چالاکڤانانی سیاسی و مەدەنی و حیزبەکانی رۆژهەڵاتی کوردستان داوایان لە خەڵک کردبوو، بۆ ناڕەزایی دەربڕین دژی گیانلەدەستدانی ژینا ئەمینی، دووکان و بازاڕ دابخەن.

 

دوێنێش لە شەقامی شەشەمی بەهمەنی سنەی رۆژهەڵاتی کوردستان گرژی و ئاڵۆزی لە نێوان خۆپێشاندەران و هێزە ئەمنییەکانی ئێران دروستبوو و تەقە بەسەر خۆپێشاندەرانی سەرکۆنەکردنی ژینا ئەمینی کرا.

 

ژینا ئەمینی ئێوارەی رۆژی سێشەممە 13-09-2022 لە وێستگەی حەقانیی میترۆی تاران لە لایەن پۆلیسی تارانەوە بە تۆمەتی پابەندنەبوون بە باڵاپۆشی دەستبەسەرکرا و دواتر بۆ گرتووخانەی پۆلیس لە شەقامی وەزیرانی تاران گوێزرایەوە. ئەو کەسانەی لەگەڵ ژینا دەستبەسەرکرابوون بە میدیاکانیان راگەیاندووە، لە کاتی گواستنەوەی بۆ گرتووخانە، هێزەکانی پۆلیس لە ژینایان داوە و لە گرتووخانە دۆخی تەندروستی تێکچووە و بەو هۆیەوە جەڵتەی دڵ و مێشک لێی داوە و  دوای سێ رۆژ گیانی لەدەستداوە.