بەڕێوەبەری فلای ئەربیل: دەکرێت گەشتی دوو شاری ئەورووپا بۆ هەولێر دوابخرێن
رووداو دیجیتاڵ
بەڕێوەبەری کۆمپانیای فلای ئەربیل دەڵێت، بەهۆی ئەو کێشە تەکنیکیییەی بۆ زۆربەی فڕۆکەخانەکانی جیهان دروسبووە، هیچ زیانمەند نەبوون و گەشتەکانیان لە کاتی خۆیدا دەکرێن، ''تەنیا لە فڕۆکەخانەی لەندن و ئەمستردام کە تووشی گرفت بوون، لەوانەیە گەشتەکان بۆ هەولێر دوابخرێن''.
ئەمڕۆ هەینی، 19-07-2024، لاوەند مەمووندی، بەڕێوەبەری رێگەپێدراوی کۆمپانیای فلای ئەربیل لە کاتی بەشداریکردنی لە بووڵتەنی کاژێر 13:00ـی تۆڕی میدیای رووداو کە سیما ئابخێزر پێشکێشیکرد، رایگەیاند: ''گەشتەکانی فلای ئەربیل بەهۆی ئەو کێشە تەکنیکییەوە هیچ نەوەستاون و گرفتێکیان رووبەڕوو نەبووەتەوە.''
لاوەند مەمووندی گوتی، زۆرترین کێشە رووبەڕووی فڕۆکەخانەی ئەمستردام بووەتەوە و ''ئێستا فڕۆکەیەکی فلای ئەربیل لە فڕۆکەخانەی ئەمستردامە و تەنیا ئێر تۆفی کۆنترۆڵی (ATC) ئەوان کێشەی هەیە و رەنگە ببێتە هۆی دواکەوتنی گەشتی ئەمستردام-هەولێر.
بەڕێوەبەری رێگەپێدراوی کۆمپانیای فلای ئەربیل ئاماژەی بەوە کرد، بەڵام ئەگەر هیچ کێشەیەک روونەدات، کاژێرێکی دیکە، فڕۆکەی فلای ئەربیل لە ئەمستردامەوە بەرەو هەولێر بەڕێدەکەوێت.
لاوەند مەمووندی گوتیشی: ''ئەمڕۆ گەشتەکانمان لە هەولێرەوە بۆ لەندن لە کاتی خۆیدا دەکرێت و هیچ کێشەیەکی رووبەڕوو نەبووەتەوە، بەڵام لە فڕۆکەخانەی لەندن کێشەی گەورە هەیە و رەنگە لەوێشەوە ببێتە هۆی ئەوەی گەشتەکان دوابکەون''.
کێشە تەکنیکییەکە زیاتر وڵاتانی ئەمریکا، ئوسترالیا و بەشێک لە وڵاتانی ئەورووپای گرتووەتەوە و زۆربەی گەشتەکانی فڕۆکەخانە و شەمەندەفەر و کەشتی وەستاون.
هەروەها سیستمی پەیوەندیکردن بە گشتی لەو شوێنانەی کە ئامێرەکانی مایکرۆسۆفت بەکاردەهێنن کێشەیان تێکەوتووە.
بەڕێوەبەری رێگەپێدراوی کۆمپانیای فلای ئەربیل گوتی: ''ئێمە بە جۆرێکی دیکە بە سیستمەکە بەستراوینەتەوە و زەرەمەند نەبووینە، تەنانەت ماڵپەڕەکانیشمان نەوەستاون و تیکتەکان لە کاتی خۆیدا دەبڕدرێن.''
کۆمپانیای کراودسترایک کە تایبەتە بە ئاسایشی ئەلیکترۆنی، لەوبارەوە رایگەیاند، کێشەکەی دەستنیشان کردووە و جیای کردووەتەوە و چارەسەرێکی خستووەتە کار بۆ کێشەکە.
وا پێشبینی دەکرێت کە ئەپدەیتێکی سۆفتوێر کە لەلایەن ئەم کۆمپانیایەیە بڵاوکرایەوە هۆکاری ئەو کێشە ئەلیکترۆنییە جیهانییە بێت، کە زۆر سێکتەری لە سەرانسەری جیهان گرتووەتەوە.