دوای حەوت ساڵ قەدەخە لەسەر هاندەرانی ئامەدسپۆر هەڵگیرا
رووداو دیجیتاڵ
ئامەدسپۆر رایگەیاند، دوای حەوت ساڵ قەدەخەکردنی بەشداریکردنی هاندەرانی لەو یارییانەی لە دەرەوەی یاریگاکەی خۆی دەکرێن، هەڵگیرا.
یانەی تۆپی پێی ئامەدسپۆر، کە یانەیەکی کوردی باکووری کوردستانە، رۆژی پێنجشەممە، 18ی ئایاری 2023، رایگەیاند، دوای 7 ساڵ، قەدەخەکردنی ئامادەبوونی هاندەرانی لە یارییەکانی دەرەوەی یاریگای ئامەد هەڵگیرا.
ئامەدسپۆر لە راگەیێندراوێکدا ئاماژەی بەوەدا، بۆ یارییەکەی ئێمە مەنەمەن F.K کە کاژێر 15:00 لە ئیزمیر بەڕێوەدەچێت، هیچ قەدەخەیەک لە بەشداریکردنی هاندەرانی یانەکەمان نییە. لە رۆژی یارییەکەدا بلیتی تیپی میوان دەفرۆشرێت، نرخی بلیتەکە 40 لیرەی تورکییە.
یانەی ئامەدسپۆر، کە زۆرینەی یاریزانەکانی کوردن، ئێستا توانیویەتی بەشداری یارییەکانی Play-Off بکات لە خولی سپی دووەم لە کۆمەڵەکەدا، بۆ ماوەی حەوت ساڵ هاندەرانی ئەو یانەی ئامەدی باکووری کوردستان نەیانتوانی لە یارییەکانی دەرەوەی یاریگەی یانەکە هانی تیپەکەیان بدەن.