رووداو دیجیتاڵ
لە کاتی کارکردن لە شەقامێکی کۆمەڵگەیەکی قەزای شنگال گۆڕێکی بەکۆمەڵی سەردەمی داعش دەدۆزرێتەوە.
خەیری عەلی، بەرپرسی رێکخراوی پتریکۆر بۆ مافەکانی مرۆڤ، بە رووداوی راگەیاند: "بەیانیی ئەمڕۆ هەینی لەکاتی کارکردن بۆ رێککردنی شەقام و دانانی شۆستە لە کۆمەڵگەی سیبا شێخ خدر، ژمارەیەک کرێکار گۆرێکی بەکۆمەڵیان دۆزییەوە کە رووفات و جلوبەرگی ئافرەتێکی بەتەمەن دەرکەوتووە."
دوای دۆزینەوەی گۆڕەکە لایەنە ئەمنی و پەیوەندیدارەکان لە گۆڕەکە ئاگادارکرانەوە.
بەگوتەی خەیری عەلی، بەرپرسی رێکخراوەکە، گۆڕەکە لە دەروازەی کۆمەڵگەکە دۆزراوەتەوە، هێشتا دیار نییە رووفاتی چەند کەسی تێدایە: "بەڵام قوربانییەکانی دەستی چەکدارانی داعشن و گۆڕەکە بۆ ساڵی 2014 دەگەڕێتەوە."
رێکخراوەکە دوای چوونە سەر گۆڕەکە، تیمەکەیان هەموو زانیارییەکانی بەردەستی بە فەرمانگەی گۆڕە بە کۆمەڵەکانی عێراق داوە و لایەنە ئەمنییەکانی ئاگادارکردووەتەوە.
دوای ئەوەی داعش لە ساڵی 2014 مووسڵ و قەزای شنگالی گرت، زیاتر لە شەش هەزار کوردی ئێزدی رفاند، بەشێک لە رفێندراوەکانی هەر لە نێو شنگال و ناوچەکانی دەوروبەری کوشتن، بەپێی ئامارە فەرمییەکان تاوەکو ئێستا 93 گۆڕی بەکۆمەڵ دۆزراونەتەوە، 55یان هەڵدراونەتەوە و 38یان ماون، لە کۆی زیاتر لە 700 رووفاتی دۆزراوە لە گۆڕە هەڵدراوەکان، 204یان بە پشکنینی دی ئێن ئەی ناسراونەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ