زاڵمای خەلیلزاد بۆ رووداو: هەندێ جار دادگەی بەغدا بڕیارێک دەدات لەگەڵ دەستوور یەکناگرێتەوە

 

 

دەشڵێت، "بە بۆچوونی من، هەندێ جار دادگەی بەغدا بڕیارێک دەدات لەگەڵ دەستوور یەکناگرێتەوە".

 

زاڵمای خەلیلزاد کە لە 2005 بۆ 2007 باڵیۆزی ئەمریکا بوو لە عێراق، لە هەڤپەیڤینێکدا لەگەڵ دیار کوردە، بەرپرسی نووسینگەی رووداو لە واشنتن ئەم قسانەی کرد.

 

خەلیلزاد ئاماژە بە کاری پێکەوەیی لایەنە کوردستانییەکان لە بەرامبەر بەغدا دەکات و دەڵێت، "پێویستە پارتە گەورەکان بە یەکەوە کاربکەن و کوردستان ئامانجی یەکەمیان بێت و هاوکاری یەکدی بکەن. هیوادارم لەو بابەتانەدا بەرەوپێشچوون هەبێت".

 

 

زاڵمای خەلیلزاد، باڵیۆزی پێشووتری ئەمریکا لە عێراق: سەرەتا، دۆخی عێراق زۆر ئاڵۆزە. لە لایەکەوە پێشهاتی هەرێمی هەیە، لەوانەش ململانێی غەززە و ئێستاش فراوانبوونی جەنگەکە دەبینین کە هێرشی حەشدی شەعبی لە عێراق بۆ سەر ئەمریکای تێدا بوو، هەرچەندە بەم دواییانە وەستاون و ئەوەش ئەرێنییە، بەڵام هێرشەکانی ئێران و ئیسرائیل بۆسەر یەکدی کاریگەرییان لەسەر عێراق هەیە. ئاشتی و سەقامگیریی ناوچەکە کاریگەرییەکی نەرێنی لەسەرە. بەڵام بەراورد بەو کاتەی من لەوێ بووم، هەندێ بەرەوپێشچوونی گەورە هەیە لەرووی ئابوورییەوە، هەرچەندە خزمەتگوزارییەکان وەک پێویست نین. پێویست بوو ئێستا عێراق سەربەخۆیی وزەی هەبوایە و کارەبای بۆ هاووڵاتییانی دابینکردبایە. هەروەها پەیوەندیی نێوان بەغدا و هەرێمی کوردستان بەو جۆرە نییە کە دەبێت هەبێت؛ ناکۆکی لەسەر نەوت و وزە هەیە، بۆریی نەوتی تورکیا داخراوە و کێشەکانی تایبەت بە بودجە چارەسەرنەکراون. بە بۆچوونی من، هەندێ جار دادگەی بەغدا بڕیارێک دەدات لەگەڵ دەستوور یەکناگرێتەوە. بەڵام دڵخۆشم کە سەرۆکوەزیران لێرەیە و باسی سەربەخۆیی وزە، رێڕەوێک بۆ بەستنەوەی عێراق بە ئەورووپا، کارەبا و خزمەتگوزارییەکان دەکات. وێنەیەکی تێكەڵاوە، بەڵام لە هەندێک رووی بەرچاوەوە، ئەرێنییە.

 

 

زاڵمای خەلیل زاد، باڵیۆزی پێشووتری ئەمریکا لە عێراق: پێم وایە پەیوەندییەکانی نێوان بەغدا و هەرێمی کوردستان ئەو کاتە باشتر بوون. لەوێ بووم کاتێک دەستوور پەسند کرا و ئاهەنگی بۆ سازکرا؛ رێککەوتن لەنێوان عێراقیەکان هەبوو، دواتر دەستوور چەسپێندرا، هەڵبژاردن کرا و حکومەت پێکهێندرا؛ ئەو کاتە ژینگەیەکی زۆر ئەرێنیتر هەبوو لە پەیوەندییەکاندا. ئێستا، پەیوەندییەکان باش نین. هەولێر، هەرێمی کوردستان کێشەی گەورەی دارایی و ئابووری هەیە، لەوانەش پەیوەست بە مووچە، هەروەها وەستانی هەناردەی نەوت هەیە. هیوادارم کە رێککەوتن لەگەڵ بەغدا ببێتە هۆی گۆڕانکاری لە کوردستان. پێویستە پارتە گەورەکان بە یەکەوە کاربکەن و کوردستان ئامانجی یەکەمیان بێت و هاوکاری یەکدی بکەن. هیوادارم لەو بابەتانەدا بەرەوپێشچوون هەبێت. 

 

 

زاڵمای خەلیل زاد، باڵیۆزی پێشووتری ئەمریکا لە عێراق: چاوم لەو گفتوگۆیەیە کە بەیانی لەگەڵی دا دەمبێت. باش تێنگەیشتووم کە روانگەکەی بۆ هەرێم و پارێزگەکان چۆنە. روانگەکەی بۆ ئابووری زۆر باش دیارە و جەخت لە سەربەخۆیی وزە دەکاتەوە، هەروەها جەخت لە بەرەوپێشبردنی ئابووری، باشترکردنی خزمەتگوزارییەکان و بەرهەمهێنانی کارەبا دەکاتەوە. هێندەی من خوێندوومەتەوە، روانگەکەی لەو بوارەیەوە ئەرێنییە. بەڵام نازانم چۆن لە هەرێمی کوردستان دەڕوانێت. جگە لەوانە، ئەو پارت و میلیشیای تایبەت بە خۆی نییە و پشت بە سەرکردە سیاسییەکانی دیکە دەبەستێت بۆ ئەوەی بواری پێبدەن بتوانێت ئامانجەکانی بەدەستبێنێت. بۆیە تەنیا ئەوە گرنگ نییە کە چۆن بیردەکاتەوە، بەڵکو ئەوەش گرنگە کە روانگەی ئەو خەڵکەی لە بەغدا پڕۆسەی سیاسییان کۆنترۆڵکردووە، میلیشیا و سەرکردە سیاسییەکان، چییە. پێم وایە روانگەکەیان زیاتر بۆ ئەوەیە کە سیستمێکی ناوەندیتر هەبێت لەبری سیستەمێکی فیدراڵی و پێدانی دەرفەت بەو پارێزگایانەی کە دەیانەوێت ببنە فیدراڵی. پێم وایە کە ئەمە ئەرێنی نییە. پێویستە رێز لە دەستوور بگیرێت و مادەکانی جێبەجێبکرێن. ئەگەر بڕیار بێت گۆڕانکاری لە دەستووردا بکرێت، ئەوا دەستوور مادەی تایبەتی هەیە لەسەر ئەوەی کە ئەو گۆڕانکارییە چۆن دەکرێن. پێم وایە لە هەندی لەو بڕیارانەی کە دراون، زەحمەتی هەبووە."