هاونیشتمانیێکی کەلار لەکاتی عومرە بە جەڵتە گیانی لەدەستدا

 

هاونیشتمانییەکە ناوی شوان عەلییە، لەدایکبووی ساڵی 1975 بوو و پێش سێ رۆژ لەگەڵ هاوژین و هاوڕێکانی، بە ئۆتۆمبێلی خۆیان چوونەتە سعودیە بۆ ئەوەی عومرە بکەن.

 

سیروان محەممەد، بەڕێوەبەری نووسینگەی حەج و عومرەی گەرمیان، ئەمشەو (چوارشەممە، 19-3-2025) بە تۆڕی میدیایی رووداوی راگەیاند "شوان، ئەم ئێوارەیە لە دوای بەجێهێنانی عومرە و لەکاتی تەوافدا لە مەککەی پیرۆز، جەڵتە لێیداوە و گیانی لەدەستداوە."

 

سیروان محەممەد گوتیشی "لەسەر رەزامەندیی کەسوکارەکەی، تەرمی ئەو هاونیشتمانییە هەر لە مەککە بەخاک دەسپێردرێت." 

 

کاروان ستوونی، بەڕێوەبەری راگەیاندنی حەج و عومرەی هەرێمی کوردستان، ئەمڕۆ (یەکشەممە 16-03-2025) بە رووداوی گوت: "لە سەرەتای ئەم ساڵەوە، 7 هاونیشتمانی کە بۆ عومرە لە سعودیە بوون، لەو وڵاتە گیانیان لەدەستداوە".

 

بە گوتەی کاروان ستوونی، مردنی هاونیشتمانییان بە هۆکاری بڵاوبوونەوەی نەخۆشی یان هۆکاری هاوشێوە نییە، گوتیشی "لەو 7 کەسەی ئەم ساڵ لە سعودیە مردوون، شەشیان مردنی ئاسایی بووە، ئەوی دیکەشیان بە هۆکاری رووداوی هاتووچۆوە بووە." 

 

لەبارەی ئامارەکانیشەوە، بەڕێوەبەری راگەیاندنی حەج و عومرەی هەرێمی کوردستان گوتی، ئەم ساڵ ئاماریان کۆنەکردووەتەوە، بەڵام ساڵی رابردوو نزیکەی 70 هەزار هاونیشتمانی عومرەیان کردووە.