هەڵەیەک روویدا! دووبارە هەوڵبدە
400 ستوونی کارەبای بۆ دانراوە بۆ ئەوەی بە شەویش وەک رۆژ رۆشن بێت
رووداو - هەولێر
بەشێکی دیکەی شەقامی 120مەتری لە هەولێر کرایەوە، قۆناخی دووەمی رێگاکە 11 کیلۆمەتر دووسایدە و بە 50 ملیۆن دۆلار تەواوکراوە.
کۆمپانیای هێمن گرووپ خەرجی تەواوکردنی گرتووەتە ئەستۆ، کەی حکومەت پارەی هاتەدەست دەیداتەوە، پڕۆژەکە ستراتیژییە بەشێوەی بازنەیی دەسوڕێتەوە بەدەووری هەولێردا رێگای هەولێر - پیرمام راستەوخۆ بە هەولێر - کۆیە دەبەستێتەوە.
چەند وەزیرێکی حکومەت و پارێزگار و ژمارەیەکی زۆر بەڕێوەبەری فەرمانگەکانی هەولێر بەشەقامەکەدا رۆشتن و دوای راوەستانیش باسی گرنگی شەقامەکەیان کرد.
نەورۆز مەولوود، وەزیری شارەوانی و گەشتوگوزار بە رووداوی راگەیاند "ئەو پڕۆژەیە گرنگییەکی ستراتیژی زۆر گەورەی بۆ شاری هەولێر هەیە، بەدڵنیاییەوە ئەوە ئەوەمان پێدەبەخشێت کە سەرەڕای قەیران بە جیهانی نیشاندەدەین کە ئێمە بەردەوامین لە خزمەتکردن و ئاوەدانکردنەوەی شارەکەمان".
بەشی دووەمی شەقامی 120مەتری هەولێر 11 کیلۆمەترە و دوو سایدی رێگای خێرا و دوو سایدی خزمەتگوزاریە، لە رێگای هەولێر-پیرمام دەستپێدەکات و لە رێگای هەولێر -کۆیە کۆتاییدێت.
کۆمپانیای هێمن گرووپ بە 50 ملیۆن دۆلار پڕۆژەکە جێبەجێدەکات و بە قەرز و خاوەنەکەی دەڵێت، بە حکومەتمان گوتووە هەرکات پارەتان هەبوو بماندەنەوە.
خالید خۆشناو، خاوەنی هێمن گرووپ بە رووداوی راگەیاند: "کردنەوەی ئەم شەقامە دەبێتە دیارییەکی گەورەی حکومەتی هەرێمی کوردستان بۆ خەڵکی هەولێری خۆشەویست، من وەکو کوڕێکی خەڵکی ئەو شارە بە خۆشحاڵییەوە وامکردووە خزمەتی هەولێر و شارەکەم بکەم".
چاوەڕێدەکرێت کردنەوەی بەشی دووەمی شەقامی 120مەتری کەمێک لەو جەنجاڵییە کەمکاتەوە کە لە شەقامە سەرەکییەکانی هەولێر هەیە، شەقامێکی پان و گەورەیە، 400 ستوونی کارەبای بۆ دانراوە بۆ ئەوەی بە شەویش وەک رۆژ رۆشن بێت، ناوەڕاستی شەقامەکەش هەمووی دەکرێتە گوڵ و سەوزایی، بە درێژایی شەقامەکەش هێماکانی هاتووچۆ دانراوە.
بە کردنەوەی ئەو بەشەی شەقامی 120 مەتری، چاوەڕێی ئەوە دەکرێت قەرەباڵخی نێو شار کەمببێتەوە، بەتایبەت ئەو قەرەباڵخییەی لەنێوان رێگای هەولێر - کۆیە و هەولێر - پیرمام و نێوان ئەو دوو رێگایەدا هەیە.
ئەمە لەکاتێکدایە لە ساڵی رابردووەوە بەشێکی دیکەی شەقامەکە لە رێگای شۆڕشەوە بۆ رێگای کەرکووک بە ئاراستەی شارۆچکەی عەینکاوەدا کراوەتەوە.
داڕشتنەوە؛ راوچی حەسەن
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ