ژنە پارێزەرێکی کورد لە سنە بە زیاتر لە شەش ساڵ زیندانیکردن سزادرا

 

بەپێی رێکخراوەکانی مافەکانی مرۆڤ لە رۆژهەڵاتی کوردستان، دادگاییکردنی گوڵاڵە وەتەندوست لە لقی یەکی دادگەی شۆڕشی سنەوە بەڕێوەچووە و بە شەش ساڵ و حەوت مانگ و 20 رۆژ زیندانیکردن سزا دراوە.

 

ئەو پارێزەرە کوردەی خەڵکی شاری مەریوان، بە "پڕوپاگەندە لە دژی حکومەت، هەوڵدان لە دژی ئاسایشی نەتەوەیی ئێران و ئەندامبوون لە گرووپە دژبەرەکانی حکومەتی ئێران" تۆمەتبار کرابوو.

 

بەپێی زانیارییەکان، دانیشتنی دادگەی ناوبراو کۆتاییەکانی مانگی تەممووزی ساڵی 2023 بەڕێوەچووە و دۆسیەکەی بەمەبەستی پێداچوونەوە رەوانەی دادگەی پێداچوونەوەی سنە کراوە.

 

ئەو پارێزەرە کوردە، رۆژی دووشەممە، 3ـی تشرینی یەکەمی 2022، لە کاتی بەڕێوەچوونی خۆپێشاندانەکانی ئێران و رۆژهەڵاتی کوردستان لەلایەن هێزە ئەمنییەکانی کۆماری ئیسلامیی ئێرانەوە لە شاری سنە دەستبەسەرکرابوو و دوای ماوەیەک بە دانانی بارمتە تاوەکو کاتی دادگاییکردنی ئازادکرابوو. 

 

گوڵاڵە وەتەندوست لە ماوەی ساڵانی رابردوودا چەندینجار لەلایەن ناوەندە ئەمنییەکانەوە بانگکراوە و لێپرسینەوەی لەگەڵدا کراوە.