رووداو دیجیتاڵ
حیزبی دیموکراتی کوردستانی ئێران لە پەیامێکدا جەخت لەسەر تەبایی و یەکڕیزی نێوماڵی کورد لە رۆژهەڵاتی کوردستان دەکاتەوە و دەڵێت، ئەو حیزبە یەکگرتوویی دەکات بە چرای رێگای خەباتی.
بەبۆنەی 75ـەمین ساڵیادی دامەزراندنی کۆماری کوردستاندا، ناوەندی سیاسیی حیزبی دیموکراتی کوردستانی ئێران پەیامێکی بڵاوکردەوە و تێیدا ئاماژە بەوە دەدات کە کۆمار نەماوە، بەڵام یادگارییەکانی وەکو ئاڵای کوردستان، سروودی نەتەوەیی ئەی رەقیب، پێشمەرگە و زمانی کوردی بوون بە سەمبول بۆ هەموو خەڵکی کوردستان و رەوایی نەتەوەییان پێ بەخشراوە.
حدکا لە پەیامەکەیدا جەخت لەسەر درێژەپێدانی رێگاکەیان بۆ هێنانەدی ئامانجەکانی کۆماری کوردستان دەکات و دەڵێت، راسپاردەی پێشەوا قازی محەممەد لە پێوەندی لەگەڵ پەرتەوازەنەبوون جێبەجێ دەکەن و تەبابوون و یەکگرتوویی دەکەن بە چرای رێگای خەباتیان.
پەیامەکەی حدکا لەکاتێکدایە کە دوو لایەنەکەی حیزبی دیموکرات، حدک و حدکا دوای 14 ساڵ لە دابڕانیان، چەند مانگێکە گەڕێکی دیکەی دانوستاندنیان بۆ یەکخستنەوەی ریزەکانیان دەستپێکردووەتەوە.
کۆماری کوردستان لە 22/01/1946 لە مهاباد دامەزرا و پێشەوا قازی محەممەد بووە سەرۆککۆماری کوردستان. تەمەنی کۆماری کوردستان کەمتر لە ساڵێک بوو و لە 15/12/1946 هێزەکانی ئێران مهاباد و شارەکانی دەوروبەریان داگیرکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ