پۆلیسی هەولێر: لەسەر کۆبوونەوەی قەرز لەسەری گەنجێک برایەکی دەکوژێت

 

رۆژی سێشەممە 18-10-2022، لە گەڕەکی کەمئەندامانی ناحیەی کەسنەزانی سەر بە پارێزگای هەولێر کوڕێک برایەکی خۆی کوشتووە. هۆگر عەزیز، گوتەبێژی پۆلیسی هەولێر بە رووداوی گوت، ئەو کەسەی کوژراوە لەلایەن براکەیەوە ناوی "ر. ج"ـە و تەمەنی 27 ساڵە. 

 

لەبارەی هۆکاری روودانی رووداوەکەوە، هۆگر عەزیز دەڵێت، "براکەی لەسەر وەرگرتنی پارە لە خەڵک و کۆبوونەوەی قەرز و نەدانەوەی کوشتوویەتی."

 

وەک گوتەبێژی پۆلیسی هەولێر دەڵێت، "تۆمەتبارەکە رایکردووە" و تیمەکانی بەڵگەی تاوان چوونەتە شوێنی رووداوەکە و لێکۆڵینەوەکان دەستیان پێکردووە. 

 

هۆگر عەزیز باسی لەوەش کرد، تۆمەتبارەکە پیشەی پاسەوانە.. کوژراوەکە 500 هەزار دۆلار [50 دەفتەر دۆلار] قەرزداربووە. دەشڵێت، تۆمەتباری رووداوەکە کە برا گەورەی کوژراوەکەیە بۆ دانەوەی قەرزی براکەی پێشتر خانوو و ئۆتۆمبێلەکەشی فرۆشتبوو.