هەڵەیەک روویدا! دووبارە هەوڵبدە
هەڵکەندن لە چاڵە شوێنەوارییەکە. وێنە: رووداو
رووداو دیجیتاڵ
چاڵێکی شوێنەواریی لە سۆران مێژووێکی دیکە لە کوردستان تۆمار دەکات، لەو چاڵە پارچەی گلێنە دۆزراونەتەوە کە سەردەمەکەیان چاخی بەردینی کانزایە و تەمەنیان حەوت هەزار و 500 ساڵە.
عەبدولوەهاب سلێمان، بەڕێوەبەری شوێنەواری سۆران بە تۆڕی میدیایی رووداوی راگەیاند، "ئەو گلێنانە نەخشێندراون کە نەخشی مرۆڤی، ئاژەڵی، نەخشی ئەندازیاری و هەروەها نەخشی فەلەکیشیان لەسەرە. لە مێژوودا باسکراوە کە بابلییەکان یەکەم کەس بوونە کەڵکیان لە زانستی کەشوهەوا وەرگرتووە و ئەوان دۆزیویانەتەوە، بەڵام ئەو گلێنانە راستیی مێژوو دەردەخەن و کوردەکانن بە هەزاران ساڵ پێش بابلییەکان سوودیان لەو زانستە وەرگرتووە."
شوێنەکە گردی بانەهێلکی سۆرانە، تیمەکانی هەردوو زانکۆی ئۆتۆنۆموسی بەرشلۆنە و زانکۆی سەلاحەدین کاری تێدا دەکەن، شوێنەکە ناوچەیەکی ئاوەدانییە، لە رووبەری 500 مەتری دووجا، پارچەی شوێنەواری زۆر دەست تیمە شوێنەوارییەکە کەوتوون.
ئانا گۆمێز، سەرۆکی تیمی زانکۆی ئۆتۆنۆموسی بەرشلۆنەیە و دەڵێت، "هەندێک کەلوپەلمان دۆزینەوە کە لە ژیانی رۆژانەدا بەکاردەهێندران وەکو بازنگ و ملوانکە، هەروەها کەلوپەلی بواری کشتوکاڵیش."
لە ڤیدیۆکەدا چاڵێک دەبینن کە قوڵییەکەی 80 سانتیمەترە، سەردەمی ئیسلام، ساسانی، برۆنزی و حەلەفی لێدۆزراوەتەوە. ئەو پارچە شوێنەوارییانەی پێشتر لەوێ دۆزراونەتەوە، لە ئیسپانیا و لە تاقیگەی کاربۆنی چواردەدا پشکنینیان بۆ کراوە و دەرخەری سەردەمی پێش مێژوون.
سرود تاڵیب، مامۆستای زانکۆی سەلاحەدین دەڵێت، کەلوپەلەکان هی سەردەمێکن کە سەردەمی پێش مێژووە، سەردەمی گەشەسندنە و بەرەو کۆمەڵگە چوونە، "سەردەمێکی هەستیارە لە کوردستان و زۆر گرنگە لە سەری بزاندرێت."
ساڵی 1950 تیمی زانکۆی شیکاگۆی ئەمریکی، هەمان ئەو تیمەی گوندی چەرمۆیان بە یەکەم ناوچەی کشتوکاڵی لە جیهاندا ناساند، بانە هێلکیان لەسەر نەخشەی شوێنەواری نووسییەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ