رووداو دیجیتاڵ
رێکخراوێکی ئەمریکی دەڵێت، فڕۆکە جەنگییەکانی تورکیا ئەمڕۆ سێ جار بۆردوومانی دوو ناوچەی بناری قەندیل لە پارێزگای سلێمانی و ناحیەی دێرەلووکی پارێزگای دهۆکیان کردووە.
کامەران عوسمان، ئەندامی تیمی کوردستانی عێراقی رێکخراوی (CPT)ی ئەمریکی بە تۆڕی میدیایی رووداوی راگەیاند: "کاژێر 2:50ـی پاشنیوەڕۆی ئەمڕۆ سێشەممە، 18ـی حوزەیرانی 2024، فڕۆکە جەنگییەکانی تورکیا دووجار بۆردوومانی تەنگی شلکێیان لە سنووری گوندی ئێندزەی بناری قەندیل کرد".
کامەران عوسمان دەڵێت: "بەهۆی هێرشەکەوە هیچ هاووڵاتییەک گیانی لەدەستنەداوە و بریندار نەبووە، بەڵام گژوگیا و دارستانی ناوچەکە سووتاوە".
ئەندامەکەی تیمی کوردستانی عێراقی رێکخراوەکە هەروەها گوتی: "کاژێر 3:10ـی پاشنیوەڕۆی ئەمڕۆ، دوای شەڕ و پێکدادانی نێوان گەریلاکانی پەکەکە و سەربازانی تورکیا لە چیای مەتین لە سنووری قەزای ئامێدی لە پارێزگای دهۆک، فڕۆکە جەنگییەکانی تورکیا بۆردوومانی بەرزاییەکانی گوندی کانێیان لە سنووری ناحیەی دێرەلووک لە قەزای ئامێدی کرد".
کامەران عوسمان گوتی: "لە سەرەتای ئەم ساڵەوە تاوەکو کۆتایی حوزەیرانی 2024، سوپای تورکیا 833 هێرش و بۆردوومانی بۆ سەر خاکی هەرێمی کوردستان هەبووە، لە ئەنجامدا هەشت هاونیشتمانی شەهید بوون."
نەخشەی هێرشەکان بەم شێوەیە بەسەر پارێزگاکان دابەش بووە:
- پارێزگای دهۆک؛ 365 هێرش و بۆردوومان
- پارێزگای هەولێر؛ 356 هێرش و بۆردوومان
- پارێزگای سلێمانی؛ 102 هێرش و بۆردوومان
- شنگال لە پارێزگای نەینەوا؛ 10 هێرش و بۆردوومان
بەپێی رێکخراو (CPT)ی ئەمریکی، لە ساڵی 2023دا هێزەکانی تورکیا 1548 جار هێرش و بۆردوومانی خاکی هەرێمی کوردستان و نەینەوایان کردووە.
1159 هێرشیان لە رێگەی فڕۆکەی جەنگی، 228 هێرشیان لە رێگەی درۆن، 114 هێرشیان لە رێگەی تۆپباران بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ