قایمقامی خۆی: لە ئەنجامی بوومەلەرزەکەی رۆژی شەممە 30 کەس بریندار بوون

 

رۆژی شەممە 17-6-2023 بوومەلەرزەیەک بە گوڕی 4.7 پلەی رێختەر ناوچەکانی باکووری پارێزگای ورمێی هەژاند، ئەوەش لەنێو خەڵکدا ترس و دڵەڕاوکێی دروستکرد.

 

زەبیحوڵڵا کازمی، قایمقامی شاری خۆی ئەمڕۆ (یەکشەممە) گوتی، لە کاتی روودانی بوومەلەرزەکەدا خەڵک رایکردووەتە دەرەوە و لەو کاتەشدا 30 کەس بریندار بوون.

 

بەگوتەی زەبیحوڵڵا کازمی، هیچ کام لە دامەزراوە سەرەکییەکانی وەک کارەبا، گاز و ئاو زیانیان بەرنەکەوتووە و دۆخی شاری خۆی ئاساییە.

 

 

رۆژی 18-01-2023 بوومەلەرزەیەک روویدا و لە ئەنجامدا 252 کەس بریندار بوون و 3 هەزار و 850 خانوو و باڵەخانە زیانیان بەرکەوت.  

 

رۆژی 28-01-2023ـیش بوومەلەرزەیەک لەو ناوچەیدا روویدا و 3 کەس گیانیان لەدەستدا و هەزار و 100 کەسیش برینداربوون. بەپێی راپۆرتی بەڕێوەبەرایەتی بیناسازی پارێزگای ورمێ، لەو بوومەلەرزەیەدا زیاتر لە 13 هەزار یەکەی نیشتەجێبوون زیانیان بەرکەوت یان رووخان.

 

سەرەتای پاییزی ساڵی پاریش لە ئەنجامی بوومەلەرزەیەک لەو شارە، هەزار و 126 کەس بریندار بوون و 5 هەزار و 100 خانووش زیانیان بەرکەوت.