پاسەوانی سنووری ئێران تەقە لە کۆڵبەرێکی کورد دەکەن و بە سەختی بریندار دەبێت
رووداو دیجیتاڵ
هێزەکانی پاسەوانی سنووری کۆماری ئیسلامیی ئێران تەقەیان لە کۆڵبەرێکی کوردی رۆژهەڵاتی کوردستان کرد و بە سەختی برینداریان کرد.
کاژێر 6:30ـی ئێوارەی ئەمڕۆ پێنجشەممە، 18-05-2023، هێزەکانی پاسەوانی سنووری کۆماری ئیسلامیی ئێران تەقەیان فاروق ئەسکەندەر عەزیزی کرد کە کۆڵبەرێکی خەڵکی رۆژهەڵاتی کوردستانە، گولـلەیەک بەر سنگی کەوتووە و بەسەختی بریندار بووە.
بەپێی ئەو زانیارییانەی دەست ئەندام جەبار، پەیامنێری تۆڕی میدیایی رووداو لە سۆران کەوتووە، بریندارەکە بە ئەمبوڵانسی نەخۆشخانەی حاجی ئۆمەران گەیێندراوەتە نەخۆشخانەی چۆمان و دوای چارەسەری سەرەتایی، بەهۆی سەختیی برینەکەیەوە رەوانەی نەخۆشخانەی ئاشتی کراوە لە سۆران.
ئەحمەد حەسەن، بەڕێوەبەری تەندروستیی چۆمان بە تۆڕی میدیایی رووداوی راگەیاند، بریندارەکە گەیێندراوەتە نەخۆشخانەی چۆمان، خوێنی زۆری لێ رۆیشتبووە، بۆیە تەندروستی ناجێگیرە.