لە گوندێکی کەرکووک منداڵێکی شەش ساڵ لە پڕۆژەیەکی ئاودێریدا خنکا

 

 

سەرهەد فاتیح، ئەندامی تیمی مەلەوانیی سەر بە پۆلیسی رووبارەوانیی پردێ بە تۆڕی میدیایی رووداوی راگەیاند، منداڵەکە ناوی موهەننەد ئیبراهیم ئەحمەدە و تەمەنی شەش ساڵ بووە، خەڵکی حەویجەیە و بە میوانی هاتبووە ماڵی خزمێکیان.

 

بەڕێوەبەرایەتیی ئاودێریی کەرکووک ئاگاداری هاووڵاتییان و هاونیشتمانییانی کردەوە کە تاوەکو تەرمەکە دەردەهێندرێت، بەشێکی ئاوەکە دەگرنەوە، بۆئەوەی تیمەکان بتوانن بەزوویی تەرمی منداڵەکە دەربهێنن.

 

بە گوتەی سەرهەد فاتیح، ئەو منداڵە لەگەڵ کەسوکارەکەی چوونەتە نزیک پڕۆژەی ئاودێرییەوە، بەڵام کەوتووەتە نێو پڕۆژەکەوە و خنکاوە.

 

ئەو ئەندامەی تیمی مەلەوانیی پردێ گوتیشی، دوای گەیشتنی تیمەکانیان، توانییان تەرمی منداڵەکە بدۆزنەوە و رادەستی کەسوکاری بکەنەوە.