کۆمپانیا ئەڵمانییەکان چاویان لەوەیە هاوشێوەی دوبەی لە هەرێمی کوردستان ئاسانکارییان بۆ بکرێت

 

 

کارێز محەممەد، بریکاری کۆمپانیای ویلۆ یە لە هەولێر؛ 13 ساڵە ئەو کارە دەکات. ئەو پەمپی ئەڵمانی هاوردە دەکات، فرۆشی ساڵانەی لە هەموو عێراق دەگاتە 7 ملیۆن دۆلار. 

 

کارێز محەممەد دەڵێت، "داهێنان و کوالێتیی باشی پەمپەکانی ئەڵمانیا وایکردووە خواستی زۆریان لەسەر بێت و تێچوویەکی زۆریش بۆ حکومەت بگەڕێتەوە، چونکە پەمپەکانی پێشتر کوالێتییان نزم بوو و ساڵانە تێکدەچوون."

 

گەرچی زۆربەی کۆمپانیاکان بنکەی سەرەکییان لە دوبەیە، دەیانەوێ وەبەرهێنانی زیاتر  لە بوارەکانی کشتوکاڵ، وزە و بیناسازی لە هەرێمی کوردستان و عێراق بکەن.

 

سونتکی هیرین، سەرۆکی ژووری بازرگانی ئاڵمانیا لە رۆژهەڵاتی نێوەڕاست لە کۆبوونەوەیەکی تایبەت بە وەبەرهێنانی کۆمپانیا ئەڵمانییەکان لە هەرێمی کوردستان رایگەیاند، "ئێمە کۆمپانیای زیاترمان هەبوو کە زۆر حەزیان دەکرد لەم کۆبونەوەیە بەشداربن، بەڵام بڕیارماندا گرووپێک دروستبکەین کە ژمارەشیان زۆرە، دیارە کە کۆمپانیا ئەڵمانییەکان زۆر بەپەرۆشن لە عێراق وەبەرهێنان ئەنجامبدەن. وەکو ژووری بازرگانیی ئەڵمانیا ئامانجمانە پشتگیری کۆمپانیا ئەڵمانییەکان بکەین تاوەکو وەبەرهێنانی زیاتر لە عێراق بکەن."

 

ئێستا لە هەرێمی کوردستان 88 کۆمپانیای ئەڵمانی کاردەکەن.  قەبارەی بازرگانیی نێوان عێراق و هەرێمی کوردستان لە ساڵی 2022، 2.9 ملیار یۆرۆ بووە، کە %20 تاوەکو %30 لە هەرێمی کوردستان بووە.

 

ساڵانە قەبارەی بازرگانی هەرێمی کوردستان لەگەڵ وڵاتان دەگاتە نزیکەی 20 میار دۆلار، چاوی کۆمپانیا ئەوروپییەکانیش لەوەیە هاوشێوەی دوبەی و وڵاتە عەرەبییەکانی دیکە بە ئاسانکاری حکومەت، وەبەرهێنانی زیاتر لە هەرێمی کوردستان بکەن.