وەزارەتی دەرەوەی ئەمریکا بۆ رووداو: دەستخۆشی لە پارتە کوردییەکان دەکەین لە بەرامبەر پێکهاتنیان

لە وەڵامی پرسیارێکی دیار کوردە، بەرپرسی نووسینگەی رووداو لە واشنتن، ڤیدانت پاتێل، جێگری گوتەبێژی وەزارەتی دەرەوەی ئەمریکا، رۆژی چوارشەممە لە کۆنگرەیەکی رۆژنامەڤانیدا گوتی: "دەستخۆشی لە پارتە کوردییەکان دەکەین لە بەرامبەر پێکهاتنیان بۆ چارەسەرکردنی کەشەکان لە رێگەی گفتوگۆ".

 

گوتەکانی ڤیدانت پاتێل لە کاتێکدایە، رۆژی سێشەممە پارتی و یەکێتی کۆبوونەوە و پابەندبوونی خۆیان بە ئەنجامدانی هەڵبژاردنەکان لە تشرینی دووەمی ئەمساڵدا دەربڕی. 

 

پاتێڵ دەڵێت "لە عێراق بە گشتی و هەرێمی کوردستانی عێراق بە تایبەتی، ئەم هەنگاوانە سوودیان دەبێت کاتێک کە سەرکردەکان سەرنجیان لەسەر پێداویستییەکانی خەڵک بێت".

 

جێگری گوتەبێژی وەزارەتی دەرەوەی ئەمریکا هاوکات دووپاتیکردەوە، واشنتن  هانی لایەنە سیاسییەکانی هەرێمی کوردستان دەدات، "پەرە بەم دەرفەتە بدەن".

 

هاوکات لە بارەی هێرشێکی درۆنیی 23ـی ئادار کە لە سووریا بووە هۆی کوژرانی بەڵێندەرێکی ئەمریکی، دیار کوردە داوای پشتڕاستکردنەوەی لە پاتێل کرد لەسەر لێدوانی بەرپرسێکی ئەمریکی بۆ میدیای وڵاتەکەی کە باسی لەوە کردبوو، هێرشەکە لەلایەن گرووپە چەکدارەکانی لایەنگری ئێران لە خاکی عێراقەوە کراوە. 

 

پاتێل رەتیکردەوە وردەکاریی لە سەر ئەو هێرشە لەلا بێت، بەڵام گوتی "جموجوڵی میلیشیا پشتیوانکراوەکانی ئێران و گرووپە بە وەکالاتەکانی، نەک تەنیا لە عێراق، بەڵکو لە هەموو ناوچەکە هێشتاش جێگەی نیگەرانیی گەورەیە بۆ ئێمە، کە ئێمە راستەوخۆ لەگەڵ هاوبەشەکانمان لە ناوچەکەدا باسی دەکەین، لە نێویاندا حکومەتی عێراق، هەروەها هۆشداریشی دا کە ئیدارەی بایدن دوودڵ نەبووە لە گرتنەبەری رێوشوێنی پێویست بۆ دڵنیابوونەوە لە پاراستنی سەربازە ئەمریکییەکان".

 

 

 

 

ڤیدانت پاتێل، جێگری گوتەبێژی وەزارەتی دەرەوەی ئەمریکا: جموجوڵی میلشیا پشتیوانکراوەکانی ئێران و گرووپە بە وەکالاتەکانی، نەک تەنیا لە عێراق بەڵکو لە هەموو ناوچەکە هێشتاش جێگەی نیگەرانیی گەورەیە بۆ ئێمە، کە ئێمە راستەوخۆ لەگەڵ هاوبەشەکانمان لە ناوچەکە باسی دەکەین، لە نێویاندا حکومەتی عێراق، بەڵام بە دیاریکراوی لەسەر ئەو هێرشە، هیچ زانیاریم نییە لێرەوە بیڵێم، رێگە بە هاوکارەکانم لە وەزارەتی بەرگری دەدەم قسە لەسەر ئەوە بکەن. تەنیا ئاماژە بەوە دەکەم کە ئەم ئیدارەیە دوودڵ نەبووە لە گرتنەبەری هەنگاو بۆ دڵنیابوونەوە لە پاراستنی سەربازەکانمان، بەڵام هیچی دیکەم پێنییە لەو بارەیەوە پێتانی رابگەیێنم.

 

 

ڤیدانت پاتێل، جێگری گوتەبێژی وەزارەتی دەرەوەی ئەمریکا: من هیچ هەڵسەنگاندنێکم نییە لێرەوە پێتانی رابگەیێنم.

 

 

ڤیدانت پاتێل، جێگری گوتەبێژی وەزارەتی دەرەوەی ئەمریکا: ئێمە دەستخۆشی لە پارتە کوردییەکان دەکەین لە بەرامبەر پێکهاتنیان بۆ چارەسەرکردنی کێشەکان لە رێگەی گفتوگۆوە. لە عێراق بە گشتی و هەرێمی کوردستانی عێراق بەتایبەتی، ئەم هەنگاوانە سوودیان دەبێت کاتێک کە سەرکردەکان سەرنجیان لەسەر پێداویستیی خەڵکە، ئێمە هانیاندەدەین پەرە بەم دەرفەتە بدەن. ئێمە پێشوازی لە هەوڵەکانی لایەنەکان دەکەین بۆ گەیشتن بە رێککەوتن لەسەر ئەنجامدانی هەڵبژاردنەکان لە کۆتایی ئەمساڵدا.