رووداو دیجیتاڵ
کۆمپانیای ئادا بۆ توێژینەوە و راپرسییەکان ADA راپرسییەکی لە هەردوو پارێزگای ئامەد و دیلۆک لە باکووری کوردستان کردووە و دەڵێت، دەم پارتی لە ئامەد و ئاکپارتی لە دیلۆک یەکەمن.
کۆمپانیاکە لە هەژماری تایبەتی خۆی لە تۆڕی ئێکس بڵاویکردەوە، لە رۆژانی 1 - 15ـی ئاداری ئەمساڵدا راپرسییەکی هاوکاتیان لە ئامەد و دیلۆکی باکووری کوردستان تایبەت بە هەڵبژاردنی شارەوانییەکانی تورکیا کردووە؛ لە هەر پارێزگایەک پرسیاری راستەوخۆیان لە 1500 کەس کردووە.
کۆمپانیای ئادا دەڵێت، ئەنجامی راپرسییەکە لە ئامەد بەم جۆرەیە؛ سێرا بوجاکی بەربژێری دەم پارتی 59.8٪ی دەنگەکانی بەدەستهێناوە؛ محەممەد خالیس بیلدەنی بەربژێری ئاکپارتی 28.2%؛ جەعفەر پاکدەمیری بەربژێری جەهەپە 3.8%؛ حیکمەت کاپڵانی بەربژێری سەر لەنوێ خۆشگوزەرانی 2.4% و بەربژێرەکانی دیکەش 5.8%ـی دەنگەکانیان بەدەستهێناوە. بەو پێیە، دەم پارتی براوەی یەکەمی ئامەدی باکووری کوردستان دەبێت.
کۆمپانیاکە ئەنجامی راپرسییەکەی پارێزگای دیلۆکیشی بڵاوکردەوە کە بەمشێوەیە: فاتمە شاهینی بەربژێری ئاکپارتی 56.3%ی دەنگەکانی بەدەستهێناوە؛ مزەفەر ئەرتورکی بەربژێری جەهەپە ی21.2%؛ شوکری یڵمازی بەربژێری سەرلەنوێ خۆشگوزەرانی 10.0%؛ سەلمان توتوملوی بەربژێری دەم پارتی 5.5% و بەربژێرەکانی دیکە 7.0%ـی دەنگەکانیان بەدەستهێناوە. بەوەش، ئاکپارتی براوەی یەکەمی دیلۆکی باکووری کوردستان دەبێت.
هەڵبژاردنی شارەوانییەکانی باکووری کوردستان و تورکیا رۆژی 31-3-2024 بەڕێوەدەچێت.
لە هەڵبژاردنەکەدا 61 ملیۆن و 441 هەزار و 882 کەس مافی دەنگدانیان هەیە کە 50.59٪ـی دەنگدەران ژن و 49.41٪یشیان پیاون؛ هەروەها ملیۆنێک و 32 هەزار و 610 کەس بۆ یەکەمجار دەنگ دەدەن.
لە هەڵبژاردنی شارەوانییەکانی ساڵی 2019دا ئاکپارتی 15 گەورەشارەوانی، جەهەپە 11 گەورەشارەوانی، هەدەپە سێ گەورەشارەوانی و مەهەپە 1 گەورەشارەوانییان بەدەستهێنا.
هەدەپە لە باکووری کوردستاندا سێ گەورەشارەوانی، پێنج شارەوانی شار، 40 شارەوانیی شارۆچکەی بەدەستهێنا، بەڵام ئێستا تەنیا پێنج شارەوانی لەدەستدا ماوەتەوە و ئەوانی دیکە قەییومیان بۆ دانرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ