سەرۆکی ژووری بازرگانیی دهۆک: هەواڵی خۆش بۆ خاوەن کارگەکان بەڕێوەیە

 

 

شوکری جەمیل لەمیانەی بەشداری لە نووڕۆژی تۆڕی میدیایی رووداو، کە لەلایەن نالین حەسەن پێشکێشدەکرێت رایگەیاند، بڕیارەکانی حکومەتی عێراق کاریگەری گەورەی لە کەرتی پیشەسازی دهۆک کردووە، "بەدەیان کارگە داخراون و کارەکانیان راگرتووە، پێشتر هەندێ کارگە شەش هێلی کارکردنی هەبووە، کەچی ئێستا تەنیا یەک کار دەکات، ئەمەش ئەگەر 200 کرێکار کاریان تێدا کردبێت، ئەمڕۆ تەنیا 15 کرێکار کاری تێدا دەکەن". 

 

سەرۆکی ژووری بازرگانی و پیشەسازیی دهۆک دەڵێت بە سەتان کرێکار بێکار بوونە و کاریگەری لەسەر خێزانەکانیان کردووەو بووەتە هۆی زیادبوونی بێکاری. 

 

بەپێی بڕیارێکی حکومەتی عێراق پێویستە هەموو کارگەکانی هەرێمی کوردستان موڵەتی کارکردن لە وەزارەتی پیشەسازی و کانزاکانی عێراق وەربگرن، ئەو کارگەیانەی مۆڵەتی بەغدایان نەبێت، رێگە بە هەناردەی بەرهەمەکانیان بۆ ناوچەکانی دیکەی عێراق نادرێت، ماوەی چەند مانگە عێراق رێگە بە بەرهەمەکانی کوردستان نادات. 

 

شوکری جەمیل رەخنە لە سیاسەتی عێراق بەرامبەر هەرێمی کوردستان دەگرێت و دەڵێت: "عێراق بە پێچەوانەی بنەماکانی فیدراڵی رەفتار دەکات، لەلایەک رێگە نادات هەرێمی کوردستان لە رووی ئابووری و سیاسییەوە سەربەخۆ بێت، لە لایەکی دیکەوە سنوور لە نێوان هەرێمی کوردستان و پارێزگاکانی دیکەی عێراق دادەنێت، ئەمەش پاکێجێکی دیکەی سزای ئابوورییە لەسەر هەرێمی کوردستان، بۆ ئەوەی ژێرخانی ئابووری و پیشەسازی هەرێمی کوردستان لاواز بکات، بە دانانی بەربەست بۆ ئاڵوگۆڕی بازرگانیی نێوان پارێزگاکانی هەرێمی کوردستان و پارێزگاکانی عێراق". 

 

هەروەها دەڵێت، لە هیچ وڵاتێکی دونیا نەبووە خاڵی گومرگی لە نێوان دوو پارێزگا هەبێت، بەڵکو لە هەموو دونیا هەوڵ دەدرێت سنووری نێوان وڵاتان نەمێنێت لە رووی بازرگانییەوە، کەچی عێراق لە نێوان پارێزگاکان دایدەنێت، کە ئەمەش خزمەت بە عێراق و هاووڵاتییانی ناکات و زیانمەندی یەکەمیش هەر هاووڵاتییە، کە نرخەکانی لەسەر گرانتر دەبن. 

 

بەپێی ئامارەکان لە ماوەی 7 ساڵی رابردوودا تەنیا لە پارێزگای سلێمانی 800 کارگە داخراون، خاوەن کارگەکان چەندین هۆکار لەوانە رێگری لە هەناردەی بەرهەمەکانیان و گرانی نرخی کارەبا و باج بە هۆکار دەزانن. 

 

شوکری جەمیل هۆشداری دەدات لە بەردەوامبوونی رێکارەکانی بەغدا و دەڵێت: "رۆژانە گلەیی خاوەن کارگەکانمان پێدەگات و کۆگاکانیان پڕبوونە لە بەرهەم و بازاڕیان نییە، رەنگە لە رۆژانی داهاتوودا چەندین کارگەی دیکەش دابخرێن، ئەگەر بەغدا لەسەر بڕیارەکانی سوور بێت."

 

بەپێی قسەی سەرۆکی ژووری بازرگانی و پیشەسازیی دهۆک، کێشەکە بەهۆی رێنماییە نوێیەکانی بەغدا دروست بووە، کە دەبێت موڵەتی کارگەکانی هەرێمی کوردستان لە وەزارەتی پیشەسازی و کانزاکانی عێراقەوە بدرێن و دەڵێت: "هەندێ کارگەمان هەن کە مامەڵەیان لە بەغدا کردووەو کۆدیان وەرگرتووە، ئەوان تاوەکو ئاستێک دەتوانن بەرهەمەکانیان بنێرنە عێراق، بەڵام لە بەغدا بەربەستی زۆر دروستدەکرێن، کارگەمان هەبووە لە دهۆک تا سێ پارێزەری لە بەغدا گرتووەو ماوەی دوو مانگە نەیانتوانیوە مامەڵەکانیان تەواو بکەن، هەر رۆژە بیانوویەک و بابەتێکیان بۆ زیاد دەکرێت". 

 

لەبارەی گفتوگۆکانی نێوان هەولێر و بەغدا بۆ چارەسەرکردنی کێشەی بەرهەمی کارگەکانی هەرێمی کوردستان، شوکری جەمیل گوتی، شاندی حکومەتی هەرێمی کوردستان لەگەڵ بەغدا گەیشتوونەتە دەرئەنجامی باش و رەنگە لە چەند رۆژی داهاتوودا هەواڵی خۆش بۆ بازرگانانی هەرێمی کوردستان هەبێت و رێککەوتنێک بکرێت بۆ دووبارە رێگەدان بە هەناردەکردنی بەرهەمی کارگەکانی کوردستان.