قایمقامی شنگال: بەشێکی زۆری ئاوارە گەڕاوەکان چوار ملیۆنەکەیان وەرنەگرتووە

 

 

وەک هاندانێک بۆ گەڕانەوەی ئاوارەکان، حکومەتی عێراق بڕیاریداوە لە رێگەی وەزارەتی کۆچ و کۆچبەرانی عێراقەوە چوار ملیۆن دینار بداتە هەر خێزانێکی ئاوارەی گەڕاوە، لەگەڵ دابینکردنی بەشێک لە پێداویستییە سەرەکییەکانی نێوماڵەکەی.

 

نایف سەیدۆ، قایمقامی قەزای شنگال بەوەکالەت، ئەمڕۆ شەممە (18-01-2025) بە تۆڕی میدیایی رووداوی راگەیاند، بەشێکی زۆری ئاوارە گەڕاوەکانی شنگال ئەو چوار ملیۆن دینارەیان وەرنەگرتووە.

 

پێشتر بڕی پارەکە ملیۆنێک و 500 هەزار دینار بوو، دواتر بۆ هاندانی زیاتر حکومەتی عێراق کردییە چوار ملیۆن دینار.

 

نایف سەیدۆ باس لەوە دەکات، تەنانەت بەشێکیان ملیۆن و 500 هەزار دینارەکەشیان وەرنەگرتووە، نەوەک چوار ملیۆن دینارەکە.

 

بە گوتەی قایمقامی قەزای شنگال بەوەکالەت، پێنەدانی ئەو پارەیە ناڕەزایی و نیگەرانی ئاوارەکانی لێکەوتووەتەوە؛ دەشڵێت، ئێستا پرۆسەی گەڕانەوەی ئاوارەکان وەستاوە.

 

عەلی عەباس، گوتەبێژی وەزارەتی کۆچ و کۆچبەرانی عێراق رۆژی 29-12-2024 بە تۆڕی میدیایی رووداوی گوت: "لە ساڵی 2024دا زیاتر لە 10 هەزار خێزانی ئاوارە کە زیاتر لە 100 هەزار کەس دەبوون، گەڕاونەتەوە زێدی خۆیان".

 

سەبارەت بە ئاوارەکانی شنگال، گوتەبێژی وەزارەتی کۆچ و کۆچبەرانی عێراق گوتی: "نزیکەی پێنج هەزار و 600 خێزان گەڕاونەتەوە شنگال".

 

لە هەرێمی کوردستان 20 کەمپی ئاوارەکان ماون؛ 16ـیان لە دهۆک و 4 دانەکەی دیکە لە هەولێرن.

 

نزیکەی 20 هەزار ئاوارە لەو کەمپانەدا دەمێننەوە؛ 18 هەزاریان لە دهۆک و 2 هەزاریان لە هەولێر.