رووداو دیجیتاڵ
گوتەبێژی کۆمەڵگەی دەروازەی نێودەوڵەتیی ئیبراهیم خەلیل دەڵێت: "ساڵی رابردوو نزیکەی 22 هەزار تۆن کەلوپەل و کەرەستەی جۆراوجۆر لە دەروازەی نێودەوڵەتیی ئیبراهیم خەلیل گەڕێندراوەتەوە."
رۆژی چوارشەممە 18-1-2023، کامی کەمال، گوتەبێژی کۆمەڵگەی دەروازەی نێودەوڵەتیی ئیبراهیم خەلیل بە تۆڕی میدیایی رووداوی گوت: "لە 1-1-2022 تاوەکو 31-12-2022، 21 هەزار و 710 تۆن کەرەستە و کەلوپەلی جۆراوجۆر له تاقیگه و لیژنە پەیوەندیدارەکانی سەر بە بەڕێوەبەرایەتیی دەروازەی نێودەوڵەتیی ئیبراهیم خەلیل پەسندنەکراون."
بە گوتەی گوتەبێژی دەروازەی نێودەوڵەتیی ئیبراهیم خەلیل، ئەو کاڵا و کەرەستانەی پەسندنەکراون بەشێکیان گەڕێندراونەتەوە و بەشێکیشیان لەنێوبراون.
کامی کەمال گوتیشی: "ئەو کاڵا و کەرەستانە جۆراوجۆر بوون؛ کەرەستەی بیناسازیی، تەندروستی، ڤێتێرنەری، خواردن و خواردنەوە و جوانکاری."
گوتەبێژی دەروازەی نێودەوڵەتیی ئیبراهیم خەلیل لەبارەی گەڕاندنەوەی ئەو کاڵا و پێداویستییانە گوتی: "لەگەڵ رێنماییەکانی حکومەتی هەرێمی کوردستان نەگونجاون. بۆ نموونە، بەشێکیان پێویست بوو کاتی بەسەرچوونیان ساڵێک بێت، بەڵام شەش مانگ بوو، واتا بەگوێرەی رێنماییەکان نەبوون."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ