لە هەڵشۆ 450 سەر مەڕ و بزنی قاچاخ بە رەنووی بەفر مرداربوون

 

رووداوەکە رۆژی دووشەممە 17-1-2022 روویداوە. بەکر وەیسی، بەڕێوەبەری ناحیەی هەڵشۆ لە سنووری قەزای پشدەر بە تۆڕی میدیایی رووداوی راگەیاند "ئەو مەڕ و بزنانە کە ژمارەیان 481 سەر بووە، لەلایەن 7 شوانەوە لە رۆژهەڵاتی کوردستانەوە بە قاچاخ داخڵی سنووری باشووری کوردستان کراون و بەهۆی بارینی بەفرێکی زۆر سەرجەم مەڕ و بزنەکان بەر رەنووی بەفر کەوتوون."

 

بەڕێوەبەری ناحیەی هەڵشۆ دەڵێت،" 450 سەر مەڕ و بزن بەهۆی رەنووی بەفرەوە لە سنوورەکانی نزیک هەڵشۆ مرداربوون و توانراوە لەلایەن شوانەکانیشەوە 31 سەر رزگار بکرێن و ئێستا لە باشووری کوردستانن."

 

بە گوتەی بەکر وەیسی ئەو مەڕ و بزنانە بەشێوەیەکی قاچاخ لە گوندەکانی بێوران، وردە و بنەخەڵەف هاتوونەتە سنووری ناحیەی هەڵشۆ. 

 

لە سنووری ناحیەی هەڵشۆی قەزای پشدەر تاوەکو ئێستا نزیکەی 30 سانتیمەتر بەفر باریوە و بەڕێوەبەری ناحیەکە دەڵێت، رێگەی زۆربەی زۆری گوندەکان داخراون و تیمەکانیان سەرقاڵی پاککردنەوەی رێگەکەن. 

لە دوو رۆژی رابردووشدا بەهۆی بارینی بەفرێکی زۆر لە چیای خۆشکی زنجیرە چیای بەمۆ لە سنووری شارۆچکەی مەیدانی ئیدارەی گەرمیان چوار شوان و 400 سەر مەڕ لەسەر چیای خۆشک گیریانخواردبوو، بەیانیی رۆژی دووشەممە بەشێک لە مەڕەکان رزگارکران.