چیرۆکی گیانلەدەستدانی چوار برا لە شەش مانگدا

 

ئەو چوار برایە ناویان محەممەد رەجەب، لەدایکبووی ساڵی 1998، ئەحمەد، لەدایکبووی ساڵی 1995، عەلی، لەدایکبووی ساڵی 2000 و وەلید، لەدایکبووی ساڵی 2002.

 

ئەمڕۆ یەکشەممە، 17.11.2024، زاهیر حوسێن، مامی ئەو گەنجانە بە رووداوی راگەیاند، وەلید لە رۆژی 14ـی ئەم مانگە بەسەر ماتۆڕەوە ئۆتۆمبێل لێیدا و ئەمڕۆ گیانی لەدەستداوە. 

 

رووداوەکە لەکاتی گەڕانەوەی وەلید لەسەر کار روویداوە و مامی دەڵێت: "قوتابیی زانکۆ بووە و کاریشی کردووە، لەبەرئەوەی زەبر بەر مێشکی کەوتووە، بەرگەی نەگرتووە و گیانی لەدەستداوە."

 

وەلید رەجەب، بچووکی پێنج برا بووە و ئێستا تەنیا برا گەورەکەیان لە ژیاندا ماوە.

 

گیانلەدەستدانی سێ براکەی دیکەی وەلید

 

دوو برای بە ناوەکانی محەممەد و ئەحمەد، لە 27-5-2024 لە روودای تەقینەوەی گازدا لە هەولێر گیانیان لەدەستداوە.

 

محەممەد لە کارگەیەکی گاز کاری کردووە و ئەحمەد سەردانیکردووە، لەو کاتەدا ئۆتۆمبێلێکی گاز گڕ دەگرێت و هەردووکیان گیان لەدەست دەدەن.

 

برای سێیەم بەناوی عەلی، رۆژی 28ـی ئابی 2024، دەچێتە زێی کەڵەک بۆ مەلەوانی، دوای ئەوەی لە شوێنێکی بەرز خۆی هەڵدەداتە ناو ئاوەکەوە، سەری بەر گاشە بەردێک دەکەوێت و دوای رۆژێک تەرمەکەی دەدۆزرێتەوە.

 

ئەو چوار برایە، دوو خوشکیان هەن. محەممەد و ئەحمەد هاوسەرگیرییان کردبوو، محەممەد منداڵی نەبووە، بەڵام ئەحمەد باوکی سێ منداڵە (کوڕێک و دوو کچ).