پێشانگەی نێودەوڵەتیی کتێب لە سلێمانی دەکرێتەوە
رووداو دیجیتاڵ
بڕیارە ئەمڕۆ پێنجشەممە بە بەشداریی نزیکەی 250 خانەی چاپ و بڵاوکردنەوە لە 20 وڵات چوارەم پێشانگەی نێودەوڵەتیی کتێب لە سلێمانی بکرێتەوە و بۆ ماوەی 10 رۆژ بەردەوام بێت، جێگری بەڕێوەبەری گشتیی پێشانگەی نێودەوڵەتیی سلێمانی دەڵێت، "رێژەی داشکاندن لە بەشێک لە کتێبەکان دەگاتە 30% بۆ 40%."
شەوقی عومەر، جێگری بەڕێوەبەری گشتیی پێشانگەی نێودەوڵەتیی سلێمانی بە تۆڕی میدیایی رووداوی راگەیاند، پێشانگەکە کاژێر 11:00 بە ئامادەبوونی ژمارەیەک لە وەزیرانی هەرێمی کوردستان و بەرپرسانی حکومەت و بەرپرسانی دیکە دەکرێتەوە.
جێگری بەڕێوەبەری گشتیی پێشانگەی نێودەوڵەتیی سلێمانی ئاماژەی بەوەش دا، پێشانگەکە کە 10 رۆژ بەردەوام دەبێت و نزیکەی 250 خانەی چاپ و بڵاوکردنەوە بەشدارن، چاوەڕوان دەکەین ئەمساڵ نزیکەی 250 هەزار کەس سەردانی پێشانگە بکەن و هەزاران کتێب بفرۆشرێن.
شەوقی عومەر ئەوەشی خستەڕوو، خانەکانی چاپ و بڵاوکردنەوە لە هەرێمی کوردستان، عێراق، تورکیا، ئێران، سووریا، سعودیە، ئوردن، سوێد، هۆڵەندا، بەریتانیا و دانیمارک و وڵاتانی دیکە بەشدارن.
بڕیارە لە چوارەم پێشانگەی نێودەوڵەتیی سلێمانی بۆ کتێب 50 هەزار ناونیشان و نزیکەی دوو ملیۆن کتێب نمایش بکرێن. بە گوتەی شەوقی عومەر، رێژەی داشکاندن بەپێی دەزگا و خانەکان لەنێوان 30% بۆ 40% دەبێت.